Ǵalymdardyń jalaqysyn kóterý, býllıngpen kúres, SmartCity: Halyq Keńesinde 66 bastama qaraldy

ASTANA. KAZINFORM — Qazaqstan Halyq Keńesinde bilim berý, ǵylym jáne adamı kapıtaldy damytýǵa qatysty 66 bastama qaraldy. Usynystar arasynda ǵalymdardyń eńbekaqysyn arttyrý, lýdomanııamen kúresý, mektepterde býllıngtiń aldyn alý jáne Aqmola oblysynda SmartCity jobasyn iske qosý bar. 

Ǵalymdardyń jalaqysyn kóterý, býllıngpen kúres, SmartCity: Halyq Keńesinde 66 bastama qaraldy
Foto: Halyq keńesi

Qazaqstan Halyq Keńesi Qoǵamdyq bastamalardy damytý komıtetiniń tóraǵasy Vera Kımniń tóraǵalyǵymen Bilim berý jáne adamı kapıtal máseleleri jónindegi salalyq komıssııanyń otyrysy ótti. Otyrysqa qatysýshylar bilim berý júıesin jetildirý, otandyq ǵylymdy damytý, suranysqa ıe mamandar daıarlaý jáne eldiń adamı kapıtalyn nyǵaıtý jónindegi usynystardy qaraýǵa basa nazar aýdardy.

Jalpy, atalǵan baǵyt boıynsha 66 bastama kelip tústi. Olar bilim berý, kásiptik daıarlyq, ǵylymı qyzmet jáne áleýmettik qoldaý máseleleriniń keń aýqymyn qamtıdy.

Otyrys barysynda Qazaqstan Halyq Keńesiniń músheleri ózekti usynystardy qarastyryp, olardyń praktıkalyq mańyzdylyǵy men iske asyrýdyń yqtımal tetikterin talqylady.

Talqylaý barysynda atap ótilgendeı, mundaı tásil jumysshy kadrlar tapshylyǵyn azaıtýǵa, jastar men eresek turǵyndardyń jumyspen qamtylý deńgeıin arttyrýǵa, sondaı-aq bilikti mamandardyń óńirlerde turaqtap qalýyna jaǵdaı jasaýǵa múmkindik beredi.

Memleket basshysynyń tapsyrmalary aıasynda Halyq Keńesiniń múshesi Jandos Aqtaev eki bastama kóterdi. Birinshiden, ol lýdomanııa máselesin tereńdete zertteýdi usyndy. Onyń aıtýynsha, bul táýeldiliktiń psıhologııalyq portretin naqty qalyptastyrýǵa jáne memlekettik organdarǵa oıynqumarlyqpen kúresýdiń tıimdi tetikterin ázirleýge múmkindik beredi.

Ekinshiden, ol Aqmola oblysynda SmartCity pılottyq jobasyn iske qosýdy usyndy. Jobanyń basty maqsaty – óńirdegi ózekti máselelerdiń tsıfrlyq atlasyn ázirleý jáne turǵyndarǵa qolaıly jaǵdaı jasaý úshin qalalyq ortanyń ergonomıkasyn jaqsartý.

Ǵylym, ınnovatsııalar men jasandy ıntellektini damytý máseleleri Dýman Orynbekovtiń bastamasynda kórinis tapty. Ol ǵylym salasyn jetildirý boıynsha keshendi sharalar usyndy. Olardyń qatarynda ǵylymdy qarjylandyrý kólemin kezeń-kezeńimen ulǵaıtý, ǵylymı uıymdardyń turaqty bazalyq qarjylandyrylýyn qamtamasyz etý, ǵylymı nátıjelerdi baǵalaý júıesin jetildirý jáne ǵalymdardyń eńbekaqysyn arttyrý bar. Sonymen qatar halyqaralyq yntymaqtastyqty keńeıtýdiń, sheteldegi qazaqstandyq ǵalymdardy tartýdyń jáne ulttyq postdoktorantýra baǵdarlamasyn iske qosýdyń mańyzdylyǵy atap ótildi.

Talqylaýdyń jeke bir bóligi adamı kapıtaldy damytýdaǵy otbasynyń róline arnaldy. Murat Ábenov bilim sapasyn arttyrý jáne otbasy men bilim berý uıymdary arasyndaǵy ózara baılanysty nyǵaıtý jóninde birqatar usynys aıtty. Atap aıtqanda, balalardy tárbıeleý men oqytý máselelerinde ata-analardy qoldaý júıesin damytý, otbasylyq kitap oqý mádenıetin qalyptastyrý jáne tsıfrlyq ortany sanaly túrde paıdalaný máseleleri kóterildi. Qoǵam qaıratkeri bul mindetterdi áleýmettik jelilermen yqpaldastyrylǵan jańa «Keńes el» dıalogtik platformasy arqyly júzege asyrýdy josparlap otyr. Platforma arqyly azamattar bilim berý jáne adamı kapıtal máseleleri boıynsha óz ıdeıalary men usynystaryn joldaı alady.

Natalıa Dementeva mektepterdegi psıhologııalyq qyzmetti damytý jáne balalardyń psıhıkalyq densaýlyǵyn qorǵaý baǵytyndaǵy jobalaryn tanystyrdy. Onyń bastamalary mektep psıhologtaryn qoldaýǵa, býllıngtiń aldyn alýǵa jáne bilim berý uıymdarynda daǵdarystyq jaǵdaılardy erte anyqtaýǵa baǵyttalǵan.

Otyrys qorytyndysy boıynsha qatysýshylar usynylǵan bastamalardy olardyń praktıkalyq mańyzdylyǵy men salany damytýǵa qosatyn yqtımal úlesin eskere otyryp, odan ári pysyqtaýdyń mańyzdylyǵyn atap ótti. Usynystar júıelenip, odan ári qaraý úshin múddeli memlekettik organdarmen jáne beıindi uıymdarmen birlesip jumys isteýge joldanady.