Ǵalymdar joıylyp ketken bókenderdi DNQ arqyly qaıta tiriltpekshi
ASTANA. KAZINFORM — Zertteýshiler mýzeıde saqtalǵan qaldyqtardan alynǵan genetıkalyq materıal men zamanaýı bıotehnologııalardy qoldanyp, joıylyp ketken kókbókendi qaıta qalpyna keltirý jobasymen aınalysyp jatyr. Bul týraly BILD agenttigi jazdy.
Ǵalymdar joıylyp ketken kókbóken — blaýbokty qaıta tiriltýge tyrysyp jatyr.
Bul janýar shamamen 200 jyldan astam ýaqyt buryn joıylyp ketken. Ol Afrıkanyń ońtústiginde meken etken, kókshil-sur túgi men ıilgen ádemi múıizderimen erekshelengen. Eýropalyq qonystanýshylardyń qarqyndy ań aýlaýynan, janýardyń meken etý ortasynyń azaıýy saldarynan XIX ǵasyrdyń basynda tolyq joıylyp ketken.
Qazir blaýboktan tek murajaıda saqtalǵan súıek qaldyqtary ǵana qalyp, olar zertteýge negiz bolyp otyr.
Colossal Biosciences mamandary ejelgi DNQ negizinde joıylyp ketken janýarlardyń genomyn qalpyna keltirý tehnologııalaryn ázirlep jatyr.
Buǵan deıin amerıkalyq kompanııa ejelgi qasqyrdy «qaıta tiriltý» jobasymen de tanylǵan edi.
Endi zertteý nysany — kókbóken. Ǵalymdar onyń DNQ-syn qazirgi týystas túri — jylqy antılopasymen salystyryp jatyr. Aıyrmashylyqtary engizilip, sonyń negizinde joıylǵan túrge barynsha uqsas janýar jasaý josparlanǵan.
Kelesi kezeńde ózgertilgen jasýsha ıadrosy alynǵan jumyrtqa jasýshasyna engiziledi, al embrıondy «sýrrogat» janýar kóteredi.
Joba merzimi áli belgisiz. Bul zertteý bir jaǵynan ekojúıege áseri týraly pikirtalas týdyrsa, ekinshi jaǵynan joǵalǵan túrlerdi ishinara qalpyna keltirýge múmkindik beredi degen úmit bar.
Byltyr Qytaıda bókenderdi baqylaıtyn robot-kıik jasaldy.
