Jerge jaqyn mańnan tirshilikke qolaıly bolýy múmkin ǵalamshar tabyldy
ASTANA. KAZINFORM – Ǵalymdar Jerge eń jaqyn ekzoplanetalardyń biri sanalatyn GJ 3378b týraly derekterdi qaıta taldap, onyń tasty ǵalamshar bolýy jáne suıyq sý bolýy múmkin aımaqta ornalasqany anyqtalǵanyn málimdedi, dep habarlaıdy DW.
Kalıfornııa ýnıversıtetiniń (Irvaın) zertteýshileri buryn gaz tárizdi «mını-Neptýn» dep eseptelgen GJ 3378b shyn máninde tasty ǵalamshar bolýy múmkin degen qorytyndyǵa keldi.
Ǵalymdardyń esepteýinshe, GJ 3378b-niń massasy Jer massasynan keminde 2,3 ese úlken. Ol óz juldyzyn shamamen 21,5 táýlikte bir aınalyp shyǵady.
Zertteýshilerdiń aıtýynsha, ǵalamshar óz juldyzynan Jerdiń Kúnnen alatyn energııasynyń shamamen 90 paıyzyn alady. Sondyqtan ol belgili bir jaǵdaılarda suıyq sý bolýy múmkin «tirshilikke qolaıly aımaqta» ornalasqan.
Degenmen bul GJ 3378b-de tirshilik bar degendi bildirmeıdi. Ǵalymdar ázirge onda atmosferanyń bar-joǵyn jáne betki qabatyndaǵy jaǵdaı qandaı ekenin bilmeıdi.
Mamandardyń pikirinshe, bul týraly naqtyraq málimetti NASA 2040-jyldary ushyrýdy josparlap otyrǵan jańa býyn ǵarysh teleskoptary bere alady.
– Bul óte qyzyqty ǵalamshar. Ol – bizdiń eń jaqyn ǵaryshtyq kórshilerimizdiń biri, – dedi zertteý tobynyń jetekshisi Pol Robertson.
GJ 3378b Jerden shamamen 25 jaryq jyly qashyqtyqta ornalasqan. Salystyrý úshin aıtqanda, Qus joly galaktıkasynyń dıametri shamamen 100 myń jaryq jylyn quraıdy. Alaıda qazirgi tehnologııalar bul ǵalamsharǵa ǵarysh apparatyn jiberýge múmkindik bermeıdi.
Eske sala ketsek, ótken aıda AQSh astronomdary «tym úlpildek» ǵalamsharlardy anyqtaǵanyn habarladyq.
