Ǵalymdar jasandy ıntellekt kómegimen qanttyń 92 yqtımal almastyrǵyshyn anyqtady
ASTANA. KAZINFORM – Izraıl ǵalymdary jasandy ıntellekt júıesiniń kómegimen qanttyń jańa almastyrǵyshtaryn jasaýǵa jaramdy 92 perspektıvaly qosylysty anyqtady. Ol úshin zertteýshiler 50 mıllıonnan astam hımııalyq zatty taldaǵan, dep habarlaıdy Food Chemistry ǵylymı jýrnaly.
Jańa tehnologııa mashınalyq oqytý men molekýlalardy kompıýterlik modeldeý ádisterin biriktiredi. Ol tátti dámge ıe bolýy múmkin, biraq keıbir jasandy táttilendirgishterge tán aşy nemese metall dámin qaldyrmaıtyn zattardy anyqtaýǵa múmkindik beredi.
Júıeni ázirleý kezinde ǵalymdar tátti jáne aşy dámi belgili qosylystar týraly derekterdi paıdalanǵan. Sonyń negizinde ártúrli hımııalyq zattardyń dámdik qasıetterin boljaı alatyn modelder jasaldy.
Odan keıin zertteýshiler quramynda shamamen 50,7 mıllıon molekýla bar úsh hımııalyq derekqordy taldady. Jasandy ıntellekt kómegimen adamnyń tátti dámdi sezetin retseptorlarymen árekettese alatyn qosylystar irikteldi.
Birneshe kezeńnen keıin yqtımal táttilendirgishterdiń tizimi 556 qosylysqa deıin qysqardy. Olardyń ishinen ǵalymdar odan ári zertteýge laıyq 92 perspektıvaly zatty bólip aldy.
Mamandardyń aıtýynsha, iriktelgen zattardyń kópshiliginiń hımııalyq qurylymy qoldanystaǵy qant almastyrǵyshtardan ózgeshe. Bul táttilendirgishterdiń múlde jańa túrlerin jasaýǵa múmkindik beredi.
Sonymen qatar zertteýshiler ázirge bul nátıjeler tek kompıýterlik modeldeý arqyly alynǵanyn atap ótti. Endi ǵalymdar anyqtalǵan qosylystardyń dámdik qasıetterin tájirıbe júzinde tekserip, qaýipsizdigi men tamaq ónerkásibinde qoldanýǵa jaramdylyǵyn baǵalaýy qajet.
Aske sala ketsek, buǵan deıin ǵalymdardyń molekýlalardyń úshólshemdi modelderi arqyly zattardyń hımııalyq formýlalaryn 99,53 paıyz dáldikpen anyqtaı alatyn neırondyq jeli ázirlegeni habarlanǵan edi. Bul tehnologııa jańa hımııalyq qosylystardyń qasıetterin boljaý úderisin jedeldetýi múmkin.
