Ǵalymdar jasandy ıntellekt arqyly oıdy oqýdy úırendi

ASTANA. KAZINFORM – Ǵalymdar sóıleýge qabileti joq adamdardyń oısha qurastyrǵan sóz tirkesterin mı ımplanty arqyly jazyp alyp, jasandy ıntellekt kómegimen 74 paıyzǵa deıingi dáldikpen tanýǵa qol jetkizdi, dep habarlaıdy DW.

Zertteýde «mı–kompıýter ınterfeısi» qoldanyldy: mıǵa engizilgen elektrod neırondyq belsendilikti tirkeıdi, al alynǵan sıgnaldar keıin ártúrli qurylǵylardy basqarý ne mátinge aınaldyrý komandalaryna túrlendiriledi. Mundaı tehnologııany saldanǵan naýqastar protezderdi basqarý nemese kompıýterde jumys isteý úshin paıdalanyp júr.

Buǵan deıingi tájirıbelerde qatysýshylar sózderdi aıtýǵa «tyrysýy» tıis bolatyn, bul óte sharshatatyn. Qazirgi zertteý júıege túsiný úshin oılaý jetkilikti ekenin kórsetti, bul sóıleý bulshyqetterin qozǵaltpaı-aq kommýnıkatsııaǵa jol ashady.

Eksperımentke búıirlik amıotrofııalyq sklerozǵa shaldyqqan jáne ınsýlt saldarynan sóıleý qabiletin joǵaltqan, qımyl-qozǵalysy shekteýli adamdar qatysqan. Degenmen qateler de bar: mysaly, «Dámi eń jaqsy dep oılaımyn» degen oıdy júıe «Menińshe, bul eń úzdik oıynshy» dep qate tanyǵan jaǵdaı tirkeldi.

Mamandardyń aıtýynsha, dáldikti arttyrý úshin derekterdi kóbeıtip, úlgini ár naýqasqa beıimdep úıretý qajet. Soǵan qaramastan, nátıje sóıleý múmkindigin joǵaltqan adamdar úshin jańa kommýnıkatsııalyq múmkindikter ashatynyn kórsetip otyr.

Aıta keteıik, Qytaıda álemdegi alǵashqy JI negizindegi selektsııalyq robot jasaldy.