Ǵalymdar vegetarıandyq genmen beriletinin dáleldedi

330 myń adam genine taldaý jasaǵannan keıin amerıkalyq ǵalymdar vegetarıandardyń ne úshin ósimdik negizindegi dıetany tańdaıtynyn anyqtady, dep habarlaıdy Kazinform bul týraly Euronews saıtyna silteme jasap.

Kóp adamdar janýarlarǵa degen janashyrlyqtan nemese kómirtegi shyǵaryndysyn azaıtý sııaqty etıkalyq sebeptermen ósimdik negizindegi dıetaǵa aýysyp jatyr.

Biraq mundaı tamaqtaný júıesine degen qushtarlyq tuqym qýalaýy múmkin be? Amerıkalyq ǵalymdar osy suraqqa jaýap izdep kórdi. 

Ǵalymdardyń aıtýynsha, ósimdik taǵamdaryn tańdaý bizdiń genetıkamyzǵa negizdelýi múmkin.

Soltústik-Batys ýnıversıtetiniń (AQSh) patologııalyq anatomııa kafedrasynyń professory Nabıl ıAsın bastaǵan zertteýshiler toby aýqymdy bıomedıtsınalyq derekter bazasyn taldady.

Olar 40 pen 69 jas aralyǵyndaǵy 5 324 vegetarıan men vegetarıan emes 329 455 adamnyń genomyn salystyrdy.

«Biz vegetarıandyqqa qatysy bar úsh gendi anyqtadyq. Taǵy 31 gen vegetarıandyqpen baılanysty bolýy múmkin», — dedi ıAsın Euronews Next arnasyna.

Genetıkalyq nusqalardyń dıetany tańdaýǵa áser etý mehanızmderi metabolızmniń, fızıologııanyń jáne dám qabyldaýdyń ózara áreketin qamtıdy.

«Dıetalyq taǵamdardy tańdaý jáne tutyný dámdi qabyldaýǵa baılanysty» delingen zertteýde.