Ǵalymdar uıqy bezi obyryn emdeýdiń jańa tásilin tapty
ASTANA. KAZINFORM — Maıamı ýnıversıtetiniń Sılvestr atyndaǵy keshendi onkologııalyq ortalyǵynyń ǵalymdary IL1RAP (jasýshalardyń qabyný sıgnaldaryn qabyldaýyna qatysatyn aqýyz) retseptoryn buǵattaý arqyly uıqy bezi isiginiń mıkroortasyn ózgertý tásilin anyqtady.
Report agenttiginiń habarlaýynsha, zertteý nátıjeleri JCI Insight jýrnalynda jarııalanǵan.
IL1RAP qabyný sıgnaldaryn berýge qatysady. Ol isik jasýshalaryn, ımmýndyq jasýshalar men fıbroblasttardy baılanystyryp, isiktiń damýyna jáne emge tózimdi bolýyna yqpal etedi.
Klınıkaǵa deıingi zertteýlerde IL1RAP-ty buǵattaý isiktegi ımmýndyq júıeniń belsendiligin basatyn jasýshalar men fıbrozdyń mólsherin azaıtyp, T-jasýshalarynyń belsendiligin arttyrǵan. Sonyń nátıjesinde isikter biriktirilgen emge jaqsyraq jaýap bergen.
Ǵalymdar bul tásildi operatsııa jasaýǵa bolatyn uıqy bezi obyryna shaldyqqan naýqastardy klınıkalyq synaqta tekserýdi josparlap otyr. IL1RAP-qa baǵyttalǵan emdi operatsııaǵa deıin hımıoterapııa jáne ımmýnoterapııamen qatar qoldaný kózdelgen.
Zertteýshilerdiń aıtýynsha, emdi operatsııaǵa deıin júrgizý isik tinin terapııaǵa deıin jáne odan keıin salystyrýǵa, sondaı-aq onyń mıkroortasyndaǵy ózgeristerdi baǵalaýǵa múmkindik beredi.
Eske sala keteıik, elimizde sońǵy jyldary onkologııalyq aýrýlardan bolatyn ólim-jitim 26,6 paıyzǵa tómendegen. Sonymen qatar qaterli isikti bastapqy kezeńde anyqtaý kórsetkishi 36,8 paıyzǵa jetip, asqynǵan jaǵdaılar 7,5 paıyzǵa azaıǵan.
Japonııada óńeshtiń qaterli isigin emdeýge arnalǵan álemdegi alǵashqy onkolıtıkalyq vırýstyq preparattyń kommertsııalyq satylymy bastaldy.
