Ǵalymdar túıe sútin kóbeıtetin jýsan negizindegi jańa jem túrin jasady
ASTANA.KAZINFORM — Qazaq qaıta óńdeý jáne taǵam ónerkásipteri ǵylymı-zertteý ınstıtýtynyń ǵalymdary jýsan negizindegi bıologııalyq belsendi qospasy bar, saýyn túıelerge arnalǵan alǵashqy otandyq ekstrýzııalanǵan qurama jemdi ázirledi. Bul týraly AShM málim etti.
Bul ázirlemeniń elimizde balamasy joq jáne onyń tıimdiligi ǵylymı zertteýler barysynda dáleldendi.
Tórt apta boıy ǵalymdar jańa qurama jemniń janýarlardyń sút ónimdiligine áserin baqylady. Nátıjesinde tájirıbelik toptaǵy janýarlardyń ortasha táýliktik sút saýymy bir basqa shaqqanda 100 ml-ge artqany anyqtaldy. Sonymen qatar súttiń sapalyq kórsetkishteri de jaqsardy: maılylyǵy 1,92%-ǵa, aqýyz mólsheri 1,52%-ǵa, al maısyz qurǵaq sút qaldyǵynyń (SOMO) úlesi 0,91%-ǵa ósti.
— Ázirlemeniń basty ereksheligi — Qazaqstan aýmaǵynda keń taralǵan jýsan ósimdigi negizinde daıyndalǵan bıologııalyq belsendi qospany paıdalanýynda. Zamanaýı óńdeý tehnologııalarynyń arqasynda ǵalymdar qorektik zattardyń tıimdi ıgerilýine jáne janýarlardyń ónimdiligin arttyrýǵa yqpal etetin fýnktsıonaldy jem ázirledi, — delingen habarlamada.
Bul ázirleme ásirese qurǵaq klımat jaǵdaıyndaǵy óńirler úshin ózekti. Sebebi túıe sharýashylyǵy mundaı aımaqtarda mal sharýashylyǵynyń eń tózimdi ári bolashaǵy zor baǵyttarynyń biri bolyp sanalady. Jańa qurama jemdi óndiriske engizý túıe sútin óndirý tıimdiligin arttyrýǵa jáne jem óndirisinde otandyq ósimdik shıkizatyn keńinen paıdalanýǵa múmkindik beredi.
Joba avtorlarynyń aıtýynsha, zertteý nátıjeleri túıe sharýashylyǵyn damytýǵa jáne túıe súti negizinde qosymsha quny joǵary ónimder óndirýge jańa múmkindikter ashatynyn atap ótti.
Buǵan deıin aqtaýlyq jas naýbaıshy shubat pen balqaımaqtan erekshe bálish daıyndaǵanyn jazdyq.
