Ǵalymdar sút jáne ósimdik maılarynan jańa ónim jasady
ASTANA. KAZINFROM — «Ulttyq agrarlyq ǵylymı-bilim berý ortalyǵy» KEAQ-tyń enshiles uıymy — «Qazaq qaıta óńdeý jáne tamaq ónerkásibi ǵylymı-zertteý ınstıtýtynyń» ǵalymdary «W-balans» fýnktsıonaldyq sary maı — ósimdik maıy negizindegi spredti óndirý tehnologııasy men retseptýrasyn ázirledi.
Ázirlemeniń ereksheligi — Omega-3 pen Omega-6 polıqanyqpaǵan maı qyshqyldarynyń araqatynasyn 1:5 deńgeıinde qamtamasyz etetin sút maıy, raps jáne zyǵyr maılarynyń úılestirilýinde.
«W-balanstyń» dástúrli maıly ónimderden aıyrmashylyǵy, onyń retseptýrasy maı qyshqyldarynyń berilgen quramy eskerile otyryp, sary maıǵa tán organoleptıkalyq qasıetterin saqtap qalatyndaı etip ázirlengen.
Ónimdegi maıdyń massalyq úlesi 72,5%-dy quraıdy. Zertteý nátıjelerine sáıkes, ónimniń sińimdiligi 97–98%. Spredte qanyqqan maılar men holesterın mólsheri tómen. Ónim 10-nan 30 °S-qa deıingi temperatýrada óziniń jumsaq ári jaǵylý qasıetin saqtaıdy.
Ázirleý barysynda retseptýralar eksperımenttik turǵydan pysyqtalyp, emýlgırleý men krıstaldanýdyń temperatýralyq jáne mehanıkalyq rejımderi zertteldi. Sondaı-aq maı qyshqyldarynyń quramyna hromatografııalyq zertteýler júrgizildi.
Retseptýrada otandyq shıkizatty — sút maıyn, raps jáne zyǵyr maılaryn paıdalaný kózdelgen. Tehnologııany maı-tońmaı ónerkásibi kásiporyndarynyń qoldanystaǵy óndiristik jelilerine ıntegratsııalaýǵa bolady.
Ázirlengen retseptýra men tehnologııalyq rejımder negizinde tehnologııalyq qujattama ázirlendi. Ǵylymı jáne ǵylymı-tehnıkalyq qyzmet nátıjesi (ǴǴTQN) resimdeldi.
Tehnologııa ónerkásiptik aýqymda óndirýge daıyndaldy. Ázirleme GOST 34178–2017 jáne KO TR 021/2011 talaptaryn eskere otyryp oryndaldy.
«W-balans» spredi fýnktsıonaldyq jáne dıetalyq taǵam ónimderin óndirýge arnalǵan. Sonymen qatar ony sanatorıılik-kýrorttyq jáne emdik-profılaktıkalyq tamaqtanýǵa arnalǵan ónimderde, sondaı-aq Healthy Food segmentinde paıdalanýǵa bolady.
Qyzyǵýshylyq tanytqan kásiporyndar úshin ázirlemeni óndiriske engizý maqsatynda tehnologııalyq qujattamany daıyndaý jáne tapsyrý múmkindigi qarastyrylǵan.
Aıta ketelik qazaqstandyq ǵalymdar bal men zimbirden jańa sýsyn ázirlegen edi.
