Ǵalymdar aıran, súzbe jáne qurttyń jańa quramyn ázirlep jatyr
ASTANA. KAZINFORM — Qazaq qaıta óńdeý jáne taǵam ónerkásibi ǵylymı-zertteý ınstıtýty ǵalymdary sút óndirisiniń janama ónimi sanalatyn sút sarysýyn tıimdi paıdalanýǵa baǵyttalǵan ǵylymı jobany júzege asyryp jatyr. Qazirgi tańda bul ónim kóbine shekteýli kólemde qoldanylyp nemese ekinshi rettik shıkizat retinde qoldanylyp keledi.
Joba aıasynda sút sarysýyn tereń óńdeý jáne ony qyshqyl sút pen súzbe ónimderin óndirýde paıdalaný tehnologııalary ázirlenip jatyr.
Ǵalymdardyń aıtýynsha, sút sarysýy joǵary taǵamdyq ári bıologııalyq qundylyqqa ıe jáne fýnktsıonaldy taǵam ónimderin jasaýǵa negiz bola alady.
Zertteýshiler sarysý negizinde aqýyz-kómirsýly kontsentrattar ázirlep, olardy bıdaı kebegi men jasymyq sekildi ósimdik tektes shıkizattarmen úılestirýde. Mundaı tásil ónimniń qorektik qundylyǵyn arttyryp qana qoımaı, sút óndirisindegi janama ónimderdi utymdy óńdeý máselesin de sheshedi.
Ázirlenip jatqan tehnologııalar fýnktsıonaldyq qasıetteri jaqsartylǵan aıran, súzbe ónimderi, qurt jáne qoıýlatylǵan sút ónimderiniń jańa túrlerin shyǵarýǵa jol ashady.
Mamandardyń aıtýynsha, jańa ónimderdiń quramynda jeńil sińetin aqýyz, taǵamdyq talshyqtar men densaýlyqty nyǵaıtyp, as qorytý júıesin jaqsartýǵa yqpal etetin bıologııalyq belsendi zattar mólsheri joǵary.
Qazirgi ýaqytta ónim retseptýralaryn ázirleý, tehnologııalyq ólshemderdi anyqtaý jáne tájirıbelik synaqtar júrgizý jumystary jalǵasyp jatyr. Aldaǵy ýaqytta bul tehnologııalardy Qazaqstannyń sút óńdeý kásiporyndarynda engizý josparlanyp otyr.
Jobany iske asyrý arqyly sút sarysýyn az qoldanylatyn janama ónimnen jańa býyndaǵy taǵam ónimderin óndirýge arnalǵan qundy shıkizatqa aınaldyrýǵa, sondaı-aq shıkizat shyǵynyn azaıtyp, eldegi sút ónerkásibindegi qaıta óńdeý tıimdiligin arttyrýǵa bolady.
Aıta ketelik elde allergııaǵa qarsy ınnovatsııalyq dári synaqtan ótip jatqany týraly jazǵan edik.
