Ǵalymdar sýdy munaıdan tazartýǵa arnalǵan kóp rettik polımer jasady

ASTANA. KAZINFORM – Sankt-Peterbor memlekettik ýnıversıtetiniń Aldyńǵy qatarly ınjenerlik mektebiniń hımıkteri sýdan munaıdy sińire alatyn materıal jasap shyǵardy, dep habarlaıdy ýnıversıtet portaly. 

Polımer qabyqshasy berik, sýǵa batpaıdy jáne qaıta paıdalanýǵa bolady. Sorbent – munaı ónimderinen jasalǵan, qalyńdyǵy bir mıkronnan az kóptegen talshyqtan turatyn ıkemdi qabyqsha. Olar lastaýshy zattardy tıimdi sińiretin gýbka tárizdi qurylymdy jasaıdy.

Polımer munaı daqtarymen janasqanda maıdy sińirip, birtindep qaraıa túsedi. Tazalaý aıaqtalǵannan keıin qabyqshany syǵyp, jýyp, qaıta paıdalanýǵa bolady, al alynǵan munaı odan ári paıdalanýǵa jaramdy bolyp qalady. Ǵalymdardyń aıtýynsha, bes tazalaý tsıklinen keıin materıaldyń sińirilý qabileti tek 15-20%-ǵa tómendeıdi.

– Biz onyń tıimdiligin munaı men munaı ónimderiniń ártúrli fraktsııalarynda synap kórdik. Sińirilýi óte joǵary. Motor maıy úshin bul materıaldyń bir gramyna – 40 gramm maı. Al shıki munaı úshin bul bir gramǵa – 20 gramm, - dedi Sankt-Peterbýrg ýnıversıtetiniń Aldyńǵy qatarly ınjenerlik mektebi Smart Ecotechnologies sektorynyń jetekshi mamany Anastasııa Nosova.

Synaqtar shynaıyǵa uqsas jaǵdaılarda júrgizildi: teńiz sýynyń tuzdylyǵy bar sý +4°C deıin salqyndatyldy, al arnaıy quraldar suıyqtyq pen tolqyndardyń qozǵalysyn modeldedi. Polımer batyp ketpeı, jańbyrly aýa raıynda jáne qatty tolqyn jaǵdaıynda da sý betinde qaldy. Jeńil, berik jáne ıkemdi, ony eń qıyn jaǵdaılarda da qoldanýǵa bolady.

Ýnıversıtet ǵalymdary bul ázirleme ekologııalyq apattarǵa qarsy kúreste tıimdi quralǵa aınalýy múmkin dep sanaıdy jáne onyń áleýetti qoldanylý salalaryn zertteýdi jalǵastyryp otyr.