Ǵalymdar otqa janbaıtyn, radıatsııaǵa tozbaıtyn, aıazǵa qatpaıtyn kabelder oılap tapty
ASTANA. KAZINFORM — Ǵylym jáne joǵary bilim mınıstri Saıasat Nurbek Úkimet otyrysynan keıin ótken baspasóz máslıhatynda qazaqstandyq ǵalymdar oılap tapqan otqa janbaıtyn kabeldi tanystyrdy.
— «Qazelektromash» degen úlken zaýytymyz bar, óndiristik kompanııa. Olar qurylysqa, óndiristik kompanııalarǵa, temirjolǵa, áýejaıǵa qajetti mynandaı kabelder shyǵarady. Bizde Almatydaǵy ıadrolyq ınstıtýt, Kýrchatovtaǵy Ulttyq ıadrolyq ortalyq, Eýrazııa ýnıversıtetindegi ortalyq sııaqty birneshe qyzyq zerthana bar. Eýrazııa ýnıversıtetindegi úlken qondyrǵy arqyly osy kabeldiń fızıkalyq qasıetin ózgertýge múmkindik aldyq, — dedi ol.
«Qazelektromashtyń» tapsyrysymen qolǵa alǵan jobanyń ónimin Ózbekstan birinshi bolyp satyp alǵan.
— «Qazelektromash» kompanııasyna aıtqanymyzda, «otqa janbaıtyn kabel kerek» degendi aıtty. Óıtkeni óndiristegi órtterdiń negizgi sebebi — qysqa tuıyqtalý. Kabeldiń syrtqy qabaty balqyp, sodan ot tutanady. Sondyqtan biz otqa salsa janbaıtyn, byqsymaıtyn kabel jasap shyǵardyq. Mundaı kabelderdiń alǵashqy legi eksportqa shyǵyp ta úlgerdi. «Ózbek temir joldary» ulttyq kompanııasy úlken tapsyrys bergen, qazir osy ónimdi qoldanyp júr. Odan keıin bizde sýyqqa arnalǵan, tómen temperatýraǵa shydamdy, radıatsııaǵa tózimdi kabelder bar, — deıdi Saıasat Nurbek.
Mınıstr atalǵan kabeldiń otqa tózimdiligin jýrnalısterge kórsetý úshin ottyqpen kúıdirgen. Áńgimege qyzý kirisip ketken Saıasat Nurbek ottyqtyń shaqpaǵy qyzǵanyn baıqamaı qalyp, saýsaǵyn kúıdirip te aldy.
Sondaı-aq, ol Óskemen ǵalymdary jasap shyǵarǵan tıtan ımplanttar otaǵa qoldanyla bastaǵanyn aıtty.