Ǵalymdar ónerkásip qaldyqtaryndaǵy qundy komponentterdi zertteıdi
ASTANA. KAZINFORM — Zertteý Aqtóbe hımııa zaýyty men Qazaqstandaǵy ferroqorytpa óndirisinen shyǵatyn qaldyqtardy, sondaı-aq Pervoýralsk jáne Novotroıtsk qalalaryndaǵy kásiporyndardyń óndiristik qaldyqtaryn qamtıdy.
Ónerkásip qaldyqtaryn qorshaǵan ortaǵa zııan keltirmeı qaıta óńdeıtin tehnologııalardy jetildirý – búgingi metallýrgııa ǵylymyndaǵy basty baǵyttardyń biri. Ásirese, óndiris barysynda tehnogendik qaldyqtar kóp túziletin hrom jáne ferroqorytpa salalary úshin bul máseleniń mańyzy zor.
Osy baǵyttaǵy ǵylymı baılanysty nyǵaıtý maqsatynda «Qazaqstan Respýblıkasynyń mıneraldyq shıkizatty keshendi qaıta óńdeý jónindegi ulttyq ortalyǵy» RMK fılıaly J. Ábishev atyndaǵy Hımııa-metallýrgııa ınstıtýtynyń ǵalymdary Ekaterınbýrg qalasyndaǵy Reseı ǵylym akademııasy Oral bólimshesiniń Metallýrgııa ınstıtýtyna jumys saparymen bardy. Sapar barysynda qazaqstandyq ǵalymdar bolat jáne ferroqorytpalar zerthanasynyń mamandarymen kezdesti.
Kezdesýdiń basty nátıjesi – eki taraptyń ǵalymdarynan quralǵan birlesken jumys tobynyń qurylýy. Onyń quramyna tehnıka ǵylymdarynyń doktory Aleksandr Kım, PhD doktory, qaýymdastyrylǵan professor Rýslan Sultanǵazıev jáne tehnıka ǵylymdarynyń doktory Oleg Zaıakın kirdi.
- Kezdesýde aldaǵy birlesken jumystyń naqty josparyn belgiledik. Aldymen qaldyqtardyń quramy men qasıetterin egjeı-tegjeıli zerttep, hromnyń olardyń quramynda qandaı kúıde kezdesetinin anyqtaımyz. Osy zertteýlerdiń negizinde alty valentti hromnyń áserin tómendetýdiń jáne qaldyqtardaǵy qundy komponentterdi qaıta óńdeýge baǵyttaýdyń eń tıimdi tehnologııalyq joldary aıqyndalady, – dedi jumys tobynyń múshesi Aleksandr Kım.
Hromdy qaldyqtardyń qorshaǵan ortaǵa keri áserin tómendetip, alty valentti hromnyń túzilýin baqylaý óndiristen keletin yqtımal ekologııalyq zııandy azaıtýǵa múmkindik beredi. Sonymen qatar qaldyqtardy qaıta óńdeý arqyly olardyń quramyndaǵy qundy komponentterdi óndiriske qaıta paıdalanýǵa bolady. Bolashaqta mundaı tásil jınalatyn qaldyq kólemin qysqartýǵa, shıkizatty tıimdi paıdalanýǵa jáne óndiris tıimdiligin arttyrýǵa yqpal etýi múmkin.
Іssapary barysynda ǵalymdar professor Vladımır Jýchkovtyń 95 jyldyq mereıtoıyna arnalǵan is-sharaǵa da qatysty.
J. Ábishev atyndaǵy Hımııa-metallýrgııa ınstıtýty men Reseı ǵylym akademııasy Oral bólimshesiniń Metallýrgııa ınstıtýty arasyndaǵy áriptestik eki ǵylymı ujymnyń bilimi men zertteý múmkindikterin ushtastyrýǵa jol ashady. Bul ónerkásip qaldyqtaryn qorshaǵan ortaǵa zııan keltirmeı qaıta óńdeýdiń is júzinde qoldanýǵa bolatyn tıimdi sheshimderin ázirleýge negiz bolmaq.
