Ǵalymdar lıtıı quramdy kenderdi óńdeýdiń jańa tehnologııasyn ázirledi
ASTANA. KAZINFORM — QR Mıneraldyq shıkizatty keshendi qaıta óńdeý jónindegi ulttyq ortalyǵynyń ǵalymdar toby quramynda lıtııi az alıýmosılıkatty kenderdi óńdeýdiń ınnovatsııalyq tehnologııasyn daıyndap shyǵardy.
Ónerkásip jáne qurylys mınıstrliginiń baspasóz qyzmeti málimetinshe, tehnologııa karbotermııalyq balqytý úderisine negizdelgen. Tehnologııa kendi keshendi óńdeýdi jáne lıtıı men alıýmınıı sılıkatynyń tolyq bólinýin qamtamasyz etedi. Sonyń nátıjesinde lıtıı kontsentratynan FS45 markaly ferroqorytpa da túziledi. Bul qorytpa metallýrgııa ónerkásibinde suranysqa ıe.
Tehnologııanyń arnaıy tańdalǵan rejımderiniń arqasynda lıtıı shlak quramynda hımııalyq belsendi kúıde shoǵyrlanady. Bul óz kezeginde kontsentratty óńdeýdi jeńildetip, odan lıtıı tuzdaryn alýǵa múmkindik beredi.
— Quramyndaǵy lıtıı mólsheri tómen kenderdi óńdeý nátıjesinde biz quramynda 12–14% lıtıı oksıdi bar kontsentrat alamyz. Bul ónimdegi lıtıı oksıdiniń mólsheri dástúrli tásilmen alynatyn uqsas ónimmen salystyrǵanda eki eseden astam joǵary. Qoldanystaǵy tehnologııalar boıynsha bul kezeńde lıtıı oksıdiniń mólsherin 5-6%-dan joǵary deńgeıge jetkizý múmkin emes, — deıdi joba jetekshisi, tehnıka ǵylymdarynyń kandıdaty Ferýza Berdiqulova.
Jańa tehnologııanyń basqa da artyqshylyqtary bar. Olardyń qataryna kúkirt qyshqylynyń agressıvti eritindilerin paıdalaný kólemin, qorshaǵan ortaǵa zııandy áserin, óndiris shyǵyndaryn azaıtý jatady. Ázirlengen tehnologııa mańyzdy metaldardyń otandyq shıkizattyq bazasyn keńeıtýge múmkindik beredi.
Buǵan deıin ShQO-daǵy lıtıı kenin ıgerý jobasy qaı kezeńde turǵanyn jazǵanbyz.
