Ǵalymdar Leonardo da Vınchı shyǵarmasynan DNQ izderin tapty

ASTANA. KAZINFORM – Ǵalymdar Leonardo da Vınchı shyǵarmasynda DNQ izderin tapty. Alǵashqy zertteýlerdiń nátıjesinde, zertteý úlgisi men óner týyndysyndaǵy genetıkalyq materıal arasynda da Vınchı otbasynyń genetıkalyq baılanysy bar ekeni anyqtaldy. Degenmen, alynǵan nátıjeler áli de tolyq tekserýdi qajet etedi, dep jazdy DW.

Zertteý tobyna jetekshilik etken amerıkalyq ǵalym Harınder Sıngh, Dj. Kreıg Venter ınstıtýtynyń ókili. Onyń toby «Qasıetti sábı» dep atalatyn jeke kollektsııadaǵy náresteniń basynyń sýretin zerttedi. Ǵalymdar mıkroskopııalyq úlgilerdi sýrettiń aldyńǵy jáne artqy jaǵynan aldy. Bakterııalardyń, sańyraýqulaqtardyń, ósimdikter men janýarlardyń DNQ-symen qatar, adamzatqa tıesili genetıkalyq materıal da tabyldy.

Alaıda, bul zertteý jumysyna kedergi keltiretin bir másele bar. Sýrettiń naqty avtory belgisiz, ónertanýshylar bul jumysty Leonardo da Vınchıdiki dep tek boljamǵa súıenip, aıtqan. Sondaı-aq, DNQ fragmentteri qatty zaqymdalǵan jáne olar ártúrli adamdarǵa tıesili bolýy múmkin, sebebi ǵasyrlar boıy kóptegen adamdar bul týyndyǵa qol tıgizgen.

Zertteý tobyna 30-dan astam ǵalym kiredi, olardyń arasynda genetıkter, antropologtar, arheologtar jáne ónertanýshylar bar. Sonymen qatar, olar da Vınchı urpaqtary, ıaǵnı ákesi jaǵynan onyń 15 tiri urpaǵynyń DNQ-syn zertteýdi josparlap otyr.

Buǵan deıin Leonardo da Vınchı salǵan aıýdyń bas sýreti rekordtyq soma — £8,9 mıllıonǵa satylǵanyn jazǵan edik.