Ǵalymdar qan ketýdi lezde toqtatatyn untaq oılap shyǵardy
ASTANA.KAZINFORM - Zertteýshiler qan ketýdi shamamen bir sekýndta toqtata alatyn untaq jasap shyǵardy. Bul jańa tehnologııa jedel medıtsınalyq kómekte mańyzdy jetistik bolýy múmkin. Sebebi ol jara betinde lezde qorǵanys tosqaýyly paıda bolýyna múmkindik beredi.
«Ýltra jyldam gemostaz jáne jedeldetilgen jaralardy emdeýge arnalǵan ıondyq geldeý untaǵynyń» zertteý nátıjeleri Advanced Functional Materials halyqaralyq ǵylymı jýrnalynda jarııalandy.
Bul ázirleme travmatologııa jáne jedel medıtsınalyq kómek salasyndaǵy negizgi mindetterdiń birin sheshýge arnalǵan: ásirese dástúrli tańǵyshtar tıimsiz bolatyn tereń jaralarda qan ketýdi dereý toqtatýǵa kómektesedi.
AGCL dep atalatyn jańa materıal untaqty gemostatıkalyq júıe túrinde usynylady. Jaraǵa jaqqan kezde ol qandaǵy kaltsıı ıondarymen árekettesip, shamamen bir sekýnd ishinde jabysqaq gıdrogel túzedi. Bul zaqymdalǵan jara betinde qorǵanys qabatyn túzedi jáne qan ketýdi toqtatýǵa kómektesedi.
AGCL quramynda algınat, gellan shaıyry, hıtozan jáne glýtaraldegıd bar. Algınat jáne gellan shaıyry geldiń tez túzilýin qamtamasyz etedi, al hıtozan qan komponentterin baılanystyrýǵa kómektesedi jáne bakterııaǵa qarsy qasıetke ıe. Bul kombınatsııa jarany tez jaýyp qana qoımaı, tabıǵı qan uıýy men tinderdi qalpyna keltirý protsesin jedeldetedi.
Tereń jaralarda qoldanylýy qıyn dástúrli gemostatıkalyq plastyrlerden aıyrmashylyǵy, untaq ártúrli pishindegi jáne tereńdiktegi jaralardy ońaı toltyrady. Zertteý onyń óz salmaǵynan shamamen 7,25 ese kóp qandy sińire alatynyn kórsetti.
Avtorlar sonymen qatar untaq bólme temperatýrasynda eki jyl tursa da óz qasıetin saqtaıtynyn anyqtady. Ol jara betine jaqsy jabysady jáne mehanıkalyq kerneý kezinde de ony tıimdi jabý qabiletin saqtaıdy.
Janýarlarǵa júrgizilgen tájirıbede AGCL klınıkalyq gemostatıkalyq materıal TachoSil-ge qaraǵanda qan joǵaltýdy azaıtyp, qan ketýdi jedel toqtatty. Sondaı-aq ol teriniń regeneratsııasyn, jańa qan tamyrlarynyń paıda bolýyn jáne kollagen túzilisin qamtamasyz etý arqyly jaralardyń jazylýyn jedeldetti.
Preparat áli de zertteý kezeńinde. Travmatologııa, hırýrgııa jáne jedel medıtsınalyq kómekke engizilmes buryn, untaq adamdarǵa qaýipsizdigi men tıimdiligin rastaý úshin qosymsha synaqtan ótedi.
Biz buǵan deıin Qazaqstan medıtsınalyq týrısterge arnalǵan «bir tereze» júıesin engizetinin habarlaǵan edik.
