Ǵalymdar, ınjenerler, kásipkerler bolmasa, tehnologııalyq serpilis jasaý múmkin emes – Prezıdent
ASTANA. KAZINFORM – Memleket basshysy AI & Digital Bridge – 2026 halyqaralyq forýmynda jasandy ıntellektini retteý máselesin qozǵady. Bul týraly Aqorda habarlady.
Ol Qazaqstanda tsıfrlyq transformatsııanyń quqyqtyq negizi qalanǵanyn, «Jasandy ıntellekt týraly» zań men Tsıfrlyq kodeks qabyldanǵanyn eske saldy. Prezıdenttiń aıtýynsha, bul arada muqııat oılastyrylǵan ınstıtýtsıonaldyq teńgerim men táýekelge negizdelgen tásil qajet.
– Atalǵan salany shamadan tys retteýge bolmaıdy. Óıtkeni áleýeti zor komandalar men ázirlemeler jáne kapıtal basqa ıýrısdıktsııalarǵa ketip qalýy yqtımal. Sondyqtan qarapaıym qaǵıdany ustanǵan jón: azamattardyń qaýipsizdigi, quqyqtary men asa mańyzdy múddeleri synǵa túsken jaǵdaıda, talaptar qatań bolýǵa tıis, alaıda shekten shyqpaǵan durys, – dedi Qasym-Jomart Toqaev.
Memleket basshysy adam kapıtalyna aıryqsha mán berdi. Prezıdenttiń pikirinshe, zamanaýı derekter ortalyǵy, ozyq tehnologııalar ózdiginen eshqandaı nátıjege kepil bola almaıdy. Ǵalymdar, ınjenerler, kásipkerler bolmasa, tehnologııalyq serpilis jasaý múmkin emes.
– Sondyqtan biz bilimdi, bilikti, jasampaz mamandar daıarlaıtyn ulttyq ǵylymı-ınjenerlik mektep qalyptastyrýymyz kerek. Osy oraıda, jańadan ashylǵan Qazaq AI Research University-ge aıryqsha mindet júkteledi. Bul oqý orny bilim berýmen qatar, óndiris pen ekonomıkanyń suranysyna saı ǵylymı zertteýler júrgizýge tıis. Osy maqsatpen jasandy ıntellektini naqty salalarda qoldanýǵa arnalǵan AI+X modeli qolǵa alynyp otyr. Onyń múmkindigin óndiris, energetıka, medıtsına, qarjy, memlekettik basqarý júıesinde tıimdi paıdalaný kerek. Jalpy, bizge daıyn ónim men jańa tehnologııa jasaı alatyn myqty, ıaǵnı naǵyz bilikti mamandar qajet. Osy tusta eskeretin mańyzdy másele bar. Jasandy ıntellekt adamnyń ıntellektýaldyq qabiletin almastyratyn qural emes, oqý jáne bilim alý úderisine kómekshi tásil bolǵany jón. Tehnologııa qarqyndy túrde damyǵan saıyn, bilim alý, synı oılaý, sheshim qabyldaý jáne jaýapkershilikti seziný qasıetteri asa ózekti bola túsedi. Bul – aqıqat, – dedi Prezıdent.
Qasym-Jomart Toqaev búginde Digital Bridge forýmy Eýrazııadaǵy bedeldi jáne tanymal tehnologııa alańyna aınalǵanyn atap ótti.
