Ǵalymdar Eýropanyń 29 elinde chıkýngýnıa vırýsynyń taralý qaýpi bar ekenin eskertti
ASTANA. KAZINFORM — Mundaı qorytyndyǵa jahandyq jylynýdy zerttep júrgen Brıtandyq ekologııa jáne gıdrologııa ortalyǵy sarapshylary keldi, dep habarlaıdy DW.
Olardyń aıtýynsha, buǵan deıin chıkýngýnıa tek ystyq elderde taralǵan, sebebi ony jylýdy jaqsy kóretin Aedes tuqymdas masalar taratady. Qazir mundaı masalar Afrıka, Azııa jáne Amerıkanyń tropıkalyq aımaqtarynda ǵana emes, Eýropada da jıi kezdesip otyr.
Chıkýngýnıa álsizdik pen býyndardyń qatty aýyrýyn týǵyzady, al balalar men egde jastaǵylar úshin ólimge ákelýi múmkin.
Aýrýdy ótkergenderdiń 40%-y bes jyldan keıin de artrıtten zardap shegedi. Sońǵy jyldary chıkýngýnıanyń jekelegen jaǵdaılary Eýropanyń 10 elinde tirkelgen.
2025 jyly Frantsııa men Italııa elderinde júzdegen adam aýyrǵan indet oshaqtary boldy. Al Ulybrıtanııa men Germanııa aýmaǵynda vırýsty tasymaldaıtyn masalar anyqtalǵanymen, ázirge aýrýdyń jappaı taralýy tirkelmegenin The Guardian jazady.
Ǵalymdardyń eskertýinshe, qazirgi klımattyq jaǵdaılarda chıkýngýnıany masalar arqyly juqtyrý Ispanııa, Portýgalııa, Italııa jáne Gretsııa elderinde jylyna 6 aıdan astam ýaqyt boıy múmkin bolýy yqtımal.
Al Belgııa, Frantsııa, Germanııa, Shveıtsarııa jáne Eýropanyń taǵy onǵa jýyq elinde bul qaýip 3–5 aıǵa sozylýy múmkin.
Aıta ketelik Reseıde chıkýngýnıa qyzbasy anyqtalǵan edi.