Ǵalymdar aýyzsýdy tazartatyn ınnovatsııalyq qondyrǵy jasady
ASTANA. KAZINFORM — Sátbaev ýnıversıtetiniń ǵalymdary aýyzsýdy bir mezgilde tazartatyn, belsendiretin, ári zararsyzdandyratyn kópfýnktsıonaldy, kópsatyly qurylǵy ázirlep shyǵardy.
Qazirgi tańda sýdyń ónerkásiptik óndiriske daıyn tájirıbelik úlgisi usynyldy.
Halyqty sapaly aýyzsýmen qamtamasyz etý — memlekettiń basym mindetteriniń biri.
— Sý ekonomıkaǵa, ekologııaǵa, halyqtyń densaýlyǵyna, jalpy barlyq salaǵa erekshe yqpal etedi. Sondyqtan sýdyń taza ári qoljetimdi bolýy óte mańyzdy, — dep Prezıdent Qasym-Jomart Toqaev atap ótken edi.
Sátbaev ýnıversıteti ǵalymdarynyń ázirlemeleri jańa tehnologııalardy tájirıbege engizýge jáne eldegi sý qaýipsizdigi salasyndaǵy mańyzdy mindetterdi sheshýge múmkindik beredi.
Osy maqsatta ınjener-ekolog, PhD doktory Úmbetáli Sarsembınniń jetekshiligimen aýyzsýdy kópsatyly óńdeýge arnalǵan «AkvaKóz» dep atalatyn kópfýnktsıonaldy qurylǵy jasaldy.
«Akvakóz» qondyrǵysynyń ereksheligi — sýdyń tabıǵı mıneraldyq quramyn saqtaı otyryp tazartady. Bul qurylǵy sýdy tazartyp qana qoımaı, adamnyń densaýlyǵyn nyǵaıtyp, uzaq ómir súrýge yqpal etedi. Qondyrǵydan ótken sýdyń qyshqyldy-totyqsyzdaný potentsıaly –130-dan –150 mV-qa deıin jetedi, bul kórsetkish sýdyń bıoaktıvti ekenin kórsetedi. Sonymen qatar sýdyń pH deńgeıi 7,4-ke teń bolady.
— Bizdiń tehnologııamyz úsh satyly júıege negizdelgen: aldymen fıltratsııa men sorbtsııa arqyly mehanıkalyq jáne organıkalyq qospalar joıylady, keıin ozondaý protsesi mıkroaǵzalardy joıyp, sýǵa antıoksıdanttyq qasıet beredi, al sońǵy kezeńde aýyr metaldar men qalǵan lastaýshy zattar tolyǵymen alynady. Nátıjesinde metaldardan, vırýstar men bakterııalardan taza, qaýipsiz aýyzsý alynady, — dedi Úmbetáli Sarsembın.
Joba Ǵylym qory men bıznes qaýymdastyǵynyń qoldaýymen júzege asyryldy. Jańa qondyrǵyny turǵyn úılerde, aýyldyq eldi mekenderde, medıtsınalyq mekemelerde, tamaq ónerkásibinde jáne tótenshe jaǵdaılarda qoldanýǵa bolady.
Aıta ketelik sý salasy mamandyqtaryna grantqa túsken stýdentter sany 71%-ǵa artqan edi.