Ǵalymdar aýadaǵy mıkroplastık mólsheriniń 100 ese kóp ekenin anyqtady

ASTANA. KAZINFORM — Adamdar kúnine 68 myńǵa deıin mıkroplastık bólshegin jutýy múmkin, bul buryn boljanǵan mólsherden shamamen 100 ese kóp, dep habarlaıdy Anadoly.

The Hill basylymynyń dereginshe mundaı qorytyndyǵa Týlýza ýnıversıteti men Frantsııanyń Ulttyq ǵylymı-zertteý ortalyǵynyń (CNRS) ǵalymdary júrgizgen zertteý nátıjesinde kelgen.

Zertteý nátıjeleri adamdar kúndelikti ómirde oılaǵannan áldeqaıda kóp mıkroplastıkti jutatynyn kórsetedi.

Zertteý barysynda ǵalymdar ártúrli turǵyn úıler men avtokólik salondarynan aýa úlgilerin jınap, mıkroplastık bólshekterdiń kontsentratsııasyn raman spektroskopııasy ádisi arqyly ólshegen.

Nátıjesinde turǵyn úılerdiń aýasynda orta eseppen ár tekshe metrge 528 mıkroplastık bólshegi anyqtalǵan, al avtokólik salonynda bul kórsetkish shamamen tórt ese joǵary bolyp shyqqan — 2 238 bólshek/m³.

Ǵalymdardyń baǵalaýynsha, adam kún saıyn dıametri 1-den 10 mıkrometrge deıingi shamamen 68 myń mıkroplastık bólshegin tynys alý arqyly jutýy múmkin.

Zertteýshiler erekshe alańdaýshylyq bildirip otyr, sebebi bul bólshekter kózge kórinbeıtindeı usaq jáne ókpeniń tereń qabatyna esh kedergisiz ene alady.

Ǵalymdar mıkroplastıkter ýly zattar bólýi múmkin ekenin, al bul zattardyń qan aınalymyna túsip, túrli aýrýlardyń damýyn týdyrýy yqtımal ekenin eskertedi.

Zertteý avtorlarynyń aıtýynsha, avtokólik salony shekteýli jeldetiletindikten, munda mıkroplastıktiń shoǵyrlanýy ásirese joǵary. Bul uzaq saparlar kezinde aǵzaǵa mıkroplastıktiń áser etý deńgeıi aıtarlyqtaı artatynyn bildiredi.

Zertteý nátıjeleri PLOS One jýrnalynda jarııalandy. 

Aıta ketelik Atlant muhıtynda 27 mıllıon tonna nanoplastık baryn aıtyp, ǵalymdar dabyl qaǵyp jatqany týraly jazǵan edik.