Ǵalymdar asyl tuqymdy buqalardyń ósimtaldyǵyn arttyrýǵa arnalǵan bıoqospaǵa patent aldy
ASTANA.KAZINFORM – «Asyl túlik» respýblıkalyq asyl tuqymdy mal sharýashylyǵy ortalyǵynyń ǵalymdary buqa dernásiliniń gomogenaty negizinde jasalǵan tabıǵı bıoqospany qoldaný arqyly asyl tuqymdy buqalardyń bıomaterıalynyń sapasy men kóbeıý qabiletin arttyrýǵa baǵyttalǵan ǵylymı zertteýdi sátti aıaqtady.
QR aýyl sharýashylyǵy mınıstrligi baspasóz qyzmetiniń habarlaýynsha, atalǵan ónertabysqa patent alynyp, zertteý nátıjeleri Q1–Q3 deńgeıindegi halyqaralyq ǵylymı jýrnaldarda jarııalandy.
Ǵylymı jumys barysynda mamandar bıoqospanyń asyl tuqymdy buqalardyń reprodýktıvtik kórsetkishterine áserin zerttedi. Nátıjesinde ázirlemeniń joǵary tıimdiligi dáleldendi, atap aıtqanda, bıomaterıal sapasy men ony paıdalaný tıimdiligi 30%-ǵa, al janýarlardyń kóbeıý qabileti 10%-ǵa artqany anyqtaldy.
Alynǵan «túıirshiktelgen gomogenat» bıoqospasy tolyqtaı tabıǵı jáne ekologııalyq taza ónim. Bul onyń zamanaýı mal sharýashylyǵy úshin bolashaǵy zor sheshimderdiń biri ekenin dáleldeıdi.
Ázirlemeniń ǵylymı mańyzymen qatar, sala úshin tájárıbelik qundylyǵy da joǵary. Ony qoldaný asyl tuqymdy mal ósirý jumystarynyń tıimdiligin arttyrýǵa, aýyl sharýashylyǵy janýarlarynyń genetıkalyq áleýetin jaqsartýǵa, sonymen birge eldiń azyq-túlik qaýipsizdigin nyǵaıtýǵa yqpal etedi.
Ǵalymdardyń aıtýynsha, bıoqospanyń kommertsııalyq áleýeti de joǵary jáne ony tehnologııany engizý jónindegi kelisimder aıasynda otandyq taýar óndirýshilermen birlesip óndirýge bolady.
-Zertteý nátıjeleriniń Q1–Q3 deńgeıindegi halyqaralyq jýrnaldarda jarııalanýy qazaqstandyq ǵylymı mekteptiń deńgeıiniń joǵary ekenin jáne jobanyń halyqaralyq ǵylymı qaýymdastyq tarapynan moıyndalǵanyn kórsetedi,-delingen habarlamada.
Osyǵan deıin asyl tuqymdy sıyr alýǵa 6 paıyzdyq nesıe berý bastalǵany týraly jazdyq.
