Ǵalymdar Aralǵa sekseýil otyrǵyzý jumysyna joǵary baǵa berdi — mınıstr
ASTANA. KAZINFORM — Bıyl Aral túbine KATKO kompanııasynyń qarajatyna 120 myń gektar jerge sekseýil tuqymy jáne 12 myń gektarǵa sekseýil kósheti otyrǵyzyldy.
Araldy qutqarý jumysy týraly Ekologııa jáne tabıǵı resýrstar mınıstri Erlan Nysanbaev aıtyp berdi.
— 2024 jyldan bastap Aral teńiziniń qurǵaǵan túbine sekseýil egý bıýdjetten tys, iri kompanııalardyń qarajaty esebinen júzege asyrylyp jatyr. Mysaly, «QazMunaıGaz» kompanııasynyń qarajaty esebinen ótken jyldyń kókteminde 15 myń gektar jerge 4,4 mıllıon sekseýil kósheti otyrǵyzyldy. Bıyl KATKO kompanııasy 2,2 mıllıard teńge bólip, 120 myń gektar jerge sekseýil tuqymy egildi jáne 12 myń gektarǵa sekseýil kósheti otyrǵyzyldy. Orman melıoratsııalyq jumysyn sapaly kóshettermen qamtamasyz etý maqsatynda jersinýi men ómirsheńdigi joǵary tuqymdardy ósiretin orman pıtomnıkteri qurylyp jatyr, — dedi Erlan Nysanbaev Úkimet otyrysynda.
Sondaı-aq Aral qasyndaǵy Qazaly qalasynda ótken jyly 33 gektar jerge, qýaty jylyna 3 mln kóshet orman pıtomnıgi salynyp, agrotehnıkalyq talaptarǵa sáıkes 10 gektaryna sekseýil tuqymy egildi.
— Bıyl Araldyń qurǵaǵan túbine 15 gektar jerde pıtomnıkti jobalaý jáne uńǵymalardy burǵylaý jumystary júrgizilip jatyr. Osy pıtomnıkte Araldyń qurǵaǵan túbiniń arıdtik jaǵdaıda beıimdelgen kóshetter otyrǵyzylady. Bul baǵyttaǵy jumysty Qyzylorda oblysynda qurylǵan Qazaq orman sharýashylyǵy ǵylymı-zertteý ınstıtýty fılıalynyń turaqty ǵylymı súıemeldeýimen júzege asyrylyp jatyr. Búginde sala sarapshylary men ǵalymdar sekseýildi otyrǵyzý jumystarynyń nátıjelerine joǵary baǵa berdi, — deıdi vedomstvo basshysy.
Keshe ǵana Aralǵa joıylýǵa shaq qalǵan qaıaz ben pilmaı balyǵynyń qaıta oralǵany týraly jazǵan edik.
Sondaı-aq Kazinform agenttiginiń menshikti tilshisi Aral teńiziniń ornynda bir kezderi gúldengen qalalar men sáýlet eskertkishteri bolǵany týraly jazdy. Arheologter sol tizimdegi Aral asar jáne Kerderi kesenelerin biregeı jádiger sanaıdy.