Ǵalymdar Altsgeımer aýrýyn emdeýde úmit kúttiretin jańalyq ashty

ASTANA. KAZINFORM — Qazirgi medıtsına tek Altsgeımer aýrýyn aldyn alýmen ǵana shektelmeı, zaqymdanǵan mı fýnktsııalaryn qalpyna keltirýge qaýqarly. Amerıkandyq ǵalymdar osyndaı qorytyndyǵa keldi, dep habarlaıdy Case Western Reserve University.

AQSh-taǵy Ýnıversıtettik aýrýhana ǵalymdar toby Klıvlendtegi Case Western Reserve ýnıversıteti jáne Lýıs Stoýks Medıtsınalyq ortalyǵymen birlesip zertteý júrgizdi. Zertteý nátıjeleri Cell Reports Medicine jýrnalynda jarııalanǵan.

Ǵalymdar Altsgeımer aýrýyna shaldyqqanda mıda NAD⁺ molekýlasynyń deńgeıi qatty tómendeıtinin anyqtaǵan. Bul molekýla kletkalardyń energııa alýyna qajet. Onyń jetispeýshiligi neırondardyń jumysyn buzyp, qabynýdy kúsheıtedi jáne aýrýǵa baılanysty zııandy aqýyzdardyń — amıloıd pen taýdyń — jınaqtalýyna ákeledi.

Eksperımenttik preparatty synaý nátıjesinde kletkalar NAD⁺ deńgeıin qalypty ustaı alatyny baıqalǵan. Tyshqandarǵa jasalǵan zertteý barysynda patologııalyq taý-belok mólsheri azaıyp, neırondyq baılanystar qalpyna kelip, kognıtıvtik fýnktsııalar jaqsarǵan.

— Negizgi qorytyndy – bul úmit habary: Altsgeımer aýrýynyń saldary árdaıym keri qaıtarylmaıtyn protsess bolyp sanalmaıdy. Belgili jaǵdaılarda zaqymdanǵan mı qalpyna kelip, qaıtadan jumys isteı alady, — dedi zertteýdiń bas avtory Endrıý A. Paıper.

Ǵalymdar málimetterdiń áli tek klınıkaǵa deıingi zertteýlerge negizdelgenin eskertedi, biraq alynǵan nátıjeler Altsgeımerdi emdeýge qatysty zertteýshiler, dárigerler jáne patsıentterdiń tásilin túbegeıli qaıta qaraýdy qajet etetinin kórsetedi.

Budan buryn ǵalymdar depressııa men dıabettiń baılanysyn anyqtaǵanyn jazǵan edik.