Ǵalymdar alǵash ret tuqym qýalaıtyn aýrýdy RNQ-ny redaktsııalaý arqyly emdedi
ASTANA. KAZINFORM – Qytaı ǵalymdary Dıýshenn bulshyqet dıstrofııasyn (MDD) emdeýde eleýli serpilis jasaǵanyn málimdedi, dep habarlaıdy Xinhua agenttigi.
Zertteýshiler LEAPER atty RNQ redaktsııalaý tehnologııasyn ázirledi. Onyń klınıkalyq qoldanylý nátıjeleri Cell jýrnalynda jarııalandy.
Bul Qytaıda jasalǵan RNQ redaktsııalaý tehnologııasynyń alǵash ret klınıkalyq synaq kezeńine jetýi bolyp otyr. Sonymen qatar álemdik tájirıbede RNQ redaktsııalaý ádisi alǵash ret Dıýshenn bulshyqet dıstrofııasyn emdeý úshin qoldanyldy.
MDD genetıkalyq mýtatsııalardyń saldarynan damyp, bulshyqetterdiń birtindep álsireýine jáne qozǵalý qabiletiniń joǵalýyna ákeledi. Aýrý ádette balalyq shaqta bastalyp, ýaqyt óte kele naýqastardyń ózdiginen júrý múmkindiginen aıyrady. Kóp jaǵdaıda dert tynys alý nemese júrek jetkiliksizdigi saldarynan mezgilsiz ólimge soqtyrady. Sırek kezdesetin aýrý sanalǵanymen, MDD-men aýyratyndar sany boıynsha Qytaı jetekshi elderdiń qataryna kiredi. Qoldanystaǵy emdeý tásilderi aýrýdyń damýyn tek baıaýlata alady, biraq ony tolyq toqtata almaıdy.
Dıýshenn bulshyqet dıstrofııasy gendik terapııa úshin eń kúrdeli nysandardyń biri sanalady. Aýrýmen baılanysty gen dástúrli ádistermen jetkizýge tym úlken, al naýqastarda 7 myńnan astam ártúrli patogendi mýtatsııa anyqtalǵan. Sondyqtan bir ǵana terapııalyq tásil ádette naýqastardyń shaǵyn bóligine ǵana kómektesedi.
LEAPER tehnologııasyn Chanpın zerthanasy men Beıjiń ýnıversıteti mamandary ázirledi. Zertteý tobynyń jetekshisi Veı Venshenniń aıtýynsha, júıe bulshyqet jasýshalaryndaǵy genetıkalyq aqparattyń zaqymdanǵan bólikterin dál taýyp, naqty mýtatsııalardy túzete alady jáne jasýshalardyń tolyqqandy aqýyz óndirý qabiletin qalpyna keltiredi.
Dástúrli ádisterden aıyrmashylyǵy, LEAPER tehnologııasy jasýshalarǵa syrttan redaktsııalaýshy fermentterdi engizýdi qajet etpeıdi. Tehnologııa arnaıy ázirlengen RNQ molekýlalaryn paıdalanyp, maqsatty RNQ-ny dál túzetý úshin adamnyń óz jasýshalaryndaǵy fermentterdi qoldanady. Sonyń arqasynda júıe salystyrmaly túrde qarapaıym ári qaýipsiz bolyp sanalady.
Kýnmın ǵylym jáne tehnologııa ýnıversıteti, Shanhaı Tszıao Týn ýnıversıteti jáne basqa da ǵylymı mekemelermen birlesip zertteýshiler jańa tehnologııa negizinde tájirıbelik preparattar ázirledi. MDD dıagnozy qoıylǵan úsh bala bir jyl boıy júrgizilgen baqylaý barysynda qozǵalys qabiletiniń aıtarlyqtaı jáne turaqty jaqsarǵanyn kórsetti.
Chanpın zerthanasynyń dırektory, Qytaı ǵylym akademııasynyń akademıgi Se Sıaolıan bolashaqta LEAPER tehnologııasy aýyr dertke shaldyqqan kóptegen patsıentke kómektesedi degen úmit bildirdi.
Eske sala ketsek, buǵan deıin qytaılyq gendik terapııa týa bitken sańyraýlardyń estý qabiletin qalpyna keltirgenin jazdyq.
