Ǵalymdar Afrıka men Ońtústik Amerıkada dınozavrlardyń uqsas izderin anyqtady

ASTANA. KAZINFORM – Dınozavrlar 120 mln jyldaı ýaqyt buryn Brazılııa men Kamerýn arasynda kóship júrgen, dep habarlaıdy Trend. 

Ońtústik Metodıst Ýnıversıtetinde (OMÝ) júrgizilgen zertteýde atap ótilgendeı, Afrıka jáne Ońtústik Amerıka qurlyqtarynan anyqtalǵan dınozavrdyń 260-tan astam izi olardyń arasy shamamen 6000 shaqyrymǵa bólingenine qaramastan sáıkes keledi.

Zertteý dınozavrlar Brazılııa men Kamerýn arasynda shamamen 120 mln jyl buryn, dálirek aıtqanda, erte bor kezeńinde kóship júrgenin kórsetti.

Pangeıa ydyraǵannan keıin paıda bolǵan Atlant muhıtynyń eki shetinde, shamamen 6000 km qashyqtyqta ornalasqan qurlyqtarda bir-birine sáıkes keletin 260-tan astam dınozavr izi tabyldy.

Uqsas izderden basqa, zertteýshiler Brazılııanyń Borborema aımaǵynda jáne Kamerýnnyń soltústigindegi basseınderde, ózender men kól qurylymdarynda uqsastyqtardyń dálelderin tapty.

Zertteý júrgizgen ǵalymdardyń biri Dıana Vınıard tabylǵan qazbalardyń kópshiligi úsh saýsaqty teropod dınozavrlaryna, al keıbireýleri tórt aıaqty zaýropodtar men ornıtoperlerge tıesili ekenin aıtty.

Zertteý salasyndaǵy jetekshi sarapshy Lýı Djeıkobs izderdiń jasy, pishini jáne geologııalyq jaǵdaıy boıynsha óte uqsas ekenin atap ótti.

Djeıkobs dınozavr tasnusqalary men olardyń izderi mıllıondaǵan jyldar buryn ǵalamsharda júrgen túrler týraly biregeı aqparat beredi dep sendiredi.

Onyń aıtýynsha, qaldyqtar dınozavrlardyń tirshilik etý ortasy men qorektený ádetteri sııaqty málimetterden syr shertip otyr.