Ǵalym Sataı Syzdyqovtyń «Qazylyq» atty tańdamaly shyǵarmalar jınaǵy jaryq kórdi
ASTANA. KAZINFORM — L.Gýmılev atyndaǵy Eýrazııa ulttyq ýnıversıtetinde Joshy ulysynyń 800 jyldyǵyna arnalǵan «Qazaq memlekettiligi: shyǵý tegi, tarıhı sabaqtastyq jáne evolıýtsııa» atty halyqaralyq ǵylymı-teorııalyq konferentsııa ótti. Іs-shara tarıh ǵylymdarynyń doktory, professor Sataı Syzdyqovtyń 70 jyldyq mereıtoıyna oraı uıymdastyryldy.
Kórnekti ǵalymdy Ǵylym jáne joǵary bilim mınıstri Saıasat Nurbek arnaıy quttyqtap, onyń 20-dan astam monografııa men 200 ǵylymı maqala jazyp, elimizdiń tarıhyna eleýi úles qosqandyǵyn erekshe atap ótedi.
«Búgingi kemel jasyńyz kásibı tájirıbeńizdi ǵylymı izdenistermen ushtasrypy, ómirilk ustanymyńyzdy, otansúıgishtikti jas urpaqqa úıretip, otandyq tarıh mektebin qalyptastyrýda ulttyq kadrlardy daıyndaýǵa súbeli úles qosyp kelesiz. Negizgi ǵylymı eńbekterińiz kóne túrki taıpalarynyń tarıhyna jáne „Alash“ partııasy qaıratkerleriniń qyzmetine arnalǵanyn kózqaraqty jurt biledi. Qazaqstan jáne túrki halyqtarynyń tarıhy men mádenıetine arnalǵan máselelerdi keshendi zerttep, otandyq tarıhtyń qyr-syryn zerdeleıtin kóptegen eńbektiń avtorysyz. Mańyzdy derekter men ómirlik naqty mysaldarǵa negizdele jazylǵan ǵylymı shyǵarmalaryńyz qashanda ózekti ári talaı urpaqty Otanǵa qyzmet etýge, óz halqynyń patrıoty bolýǵa tárbıeleıtini anyq», — delingen mınıstr quttyqtaýynda.
Konferentsııa barysynda ǵalymnyń 4-tomdyq «Qazylyq» atty tańdamaly shyǵarmalar jınaǵynyń tanystyrylymy ótti.
«Qazylyq — qazaqtyń erteden kele jatqan kıeli, qasıetti sózi. Onyń mánisi mynada. Ol memlekettilikti bildiredi. Óıtkeni, bıler ınstıtýty kezinde qazylyq etkende búkil eldiń ózekti máseleler sheshetin bolǵan. Sondyqtan qazylyq etý degen sóz shyqqan. Qaı jerde qazylyq etken? Kıiz úıge syımaıtyn bolǵandyqtan tóbege jınalyp, halyqty shaqyryp, demkoratııalyq turǵyda, eldiń kózinshe bılik aıtqan», — dedi jınaq avtory Sataı Syzdyqov.
Májilis depýtaty Erkin Ábil mereıtoı ıesin quttyqtap, izgi tilegin jetkizdi.
«Joshy uly bos jerde paıda bolǵan joq. Onyń negizi bolǵan — túrki memleketteri. Sol túrki memleketterin ómir boıy zerttep júrgen ǵalym- Sataı Syzdyqov. Ulttyq sanamyzdy qalyptastyratyn mundaı konferentsııanyń ǵylymı ǵana emes, sonymen birge saıası da máni bar. Ulttyq sananyń negizi — tarıhı sana. Sol tarıhı sanany osyndaı is-sharalar qalyptastyrady», — dedi ol.
