Ǵalym Qulekeev Qaraǵandy oblystyq sotynyń tóraǵasy bolyp taǵaıyndaldy
QARAǴANDY. KAZINFORM – Joǵarǵy Sot Tóraǵasy Aslambek Merǵalıev Qaraǵandy oblysynyń sýdıalar korpýsyna Qazaqstan Prezıdentiniń Jarlyǵymen taǵaıyndalǵan oblystyq sottyń jańa tóraǵasy Ǵalym Qulekeevti tanystyrdy.
Saltanatty rásimge Qaraǵandy oblysynyń ákimi Ermaǵanbet Bólekpaev, sýdıalar, sot júıesiniń ardagerleri, quqyq qorǵaý jáne memlekettik organdardyń basshylary, óńir sottarynyń qyzmetkerleri qatysty.
Іs-sharany ashqan Aslambek Merǵalıev otstavkaǵa shyǵýyna baılanysty Qaraǵandy oblystyq sotynyń tóraǵasy laýazymyndaǵy jumysyn aıaqtaǵan Erden Áripovke alǵysyn bildirip, onyń oblystyń sot júıesin damytýǵa qosqan úlesin atap ótti.
Jańa basshyny tanystyra otyryp, Joǵarǵy Sot Tóraǵasy Ǵalym Kulekeevtiń sot júıesinde aıtarlyqtaı tájirıbesi bar, sýdıalar qaýymdastyǵy arasynda laıyqty bedelge jáne minsiz kásibı bedelge ıe ekenin atap ótti.
Ol Ǵalym Qulekeevtiń basshylyǵymen Qaraǵandy oblystyq soty sot tóreligin júzege asyrý sapasyn odan ári arttyrýdy, azamattar men uıymdardyń quqyqtaryn tıimdi qorǵaýdy qamtamasyz etetinine, sondaı-aq qoǵamnyń sot bıligine degen senimin nyǵaıtý jónindegi jumysty jalǵastyratynyna senim bildirdi.
Kezdesý sońynda Aslambek Merǵalıev óńirdiń sýdıalar korpýsynyń aldynda turǵan basym mindetterdi belgiledi.
Zań ústemdigi qaǵıdatyn múltiksiz saqtaýǵa, sot praktıkasynyń birkelkiligin qamtamasyz etýge, sottardyń ashyqtyǵy men sot tóreligin iske asyrý sapasyn arttyrýǵa erekshe nazar aýdarylady.
Ǵalym Batyrbekuly Qulekeev 1979 jyly Jambyl oblysy Qarataý qalasynda dúnıege kelgen.
2000 jyly ál-Farabı atyndaǵy Qazaq memlekettik ulttyq ýnıversıtetiniń zań fakýltetin bitirgen.
2002 jyly – M.H.Dýlatı atyndaǵy Taraz memlekettik ýnıversıtetiniń ekonomıka fakýltetin, al 2024 jyly – sol JOO zań fakýltetiniń magıstratýrasyn aıaqtaǵan.
2000-2007 jyldary sot júıesi men memlekettik organdarda túrli qyzmetter atqardy,
2007-2010 jyldary – Astana qalasy Almaty aýdandyq sotynyń sýdıasy,
2010-2012 jyldary –Jambyl oblysy Jambyl aýdandyq sotynyń tóraǵasy,
2012-2024 jyldary – Jambyl oblystyq sotynyń sýdıasy.
2024 jyldan bastap qazirgi ýaqytqa deıin – Qaraǵandy oblystyq sotynyń azamattyq ister jónindegi sot alqasynyń tóraǵasy.
