Ǵalym: Bazardaǵy sapasyz et eldegi onkologııalyq ahýaldy ýshyqtyryp barady
ASTANA. KAZINFORM — Sáken Seıfýllın atyndaǵy Qazaq agrotehnıkalyq ýnıversıtetiniń ǵylym jáne ınnovatsııa jónindegi prorektory Erjan Syrǵalıev Májiliste ótip jatqan taqyryptyq otyrysta el bazarlarynda satylyp jatqan ettiń sapasyna alańdaıtynyn aıtty.
— Sózimniń aıaǵynda mynany aıtqym keledi. Birneshe kún buryn Dúnıejúzilik tamaq qaýipsizdiginiń kúni boldy. Men sizderdiń nazarlaryńyzdy tek myna máselege aýdarǵym keledi. Dástúrli aýyl sharýashylyǵy, onyń ishinde gormondar men antıbıotıkteri mol mal sharýashylyǵy Qazaqstandaǵy onkologııalyq aýrýlardyń statıstıkasy óte joǵary bolýyna alyp keldi. Ókinishke qaraı, qazir bul máseleni kóterip júrgen joqpyz, — dedi ǵalym.
Prorektordyń aıtýynsha, ǵalymdar eldegi bazarlarda satylyp jatqan ettiń quramynda gormondar men antıbıotıkter qansha ekenine taldaý júrgizipti.
— Biz megamaqsattyq qarjylandyrý aıasynda júrgizgen zertteýler kezinde Qazaqstandaǵy bazarlardyń bárine et quramyndaǵy gormondar men antıbıotıkter boıynsha taldaý júrgizdik. Tipti ózimizdiń dástúrli túrde organıkalyq dep atap júrgen jylqy etiniń 80 paıyzynda gormondar men antıbıotıkter bar. Sondyqtan osy ahýal organıkalyq negizde jumys isteıtin sharýashylyqtardy damytýǵa múddelilikti arttyrady, — dedi Erjan Syrǵalıev.
Buǵan deıin el óńirlerinde tartylǵan et baǵasy qansha ekenin jazǵan edik.