Galbadrah Otgontsetseg álem chempıonatynyń qola medalin jeńip aldy
ASTANA. QazAqparat - Ázerbaıjan astanasy Bakýde dzıýdodan ótip jatqan álem chempıonatynda Galbadrah Otgontsetseg qola júldege ıe boldy, dep habarlaıdy QazAqparat tilshisi.
Búgin, ıaǵnı jarystyń alǵashqy kúni boz kilemge jeńil salmaqtaǵy tatamı sheberleri shyqty. 48 kelige deıingi salmaqta el namysyn qorǵaǵan burymdy balýanymyz Galbadrah Otgontsetseg shırek fınalda Eýropa chempıony ýkraınalyq Darıa Bılodıdten utylyp, fınalǵa jete almady. Degenmen ol jubanysh beldesýdegi qarsylasy Slovenııa sportshysy Marýsa Stangerdi jeńip, qola medal úshin beldesýge múmkindik aldy. Galbadrah úshinshi orynǵa talasý kezinde óziniń burynǵy otandasy - monǵolııalyq balýan Mýnhbat Ýrantsetsegpen kezdesti. Qarsylasynan aılasyn asyrǵan ol, álem chempıonatynyń qola júldegeri atandy.
Sondaı-aq, búgin Qazaqstan sapynan erlerden 60 kelige deıingi salmaqta Ǵusman Qyrǵyzbaev synǵa tústi. Ókinishke qaraı Qyrǵyzbaev irikteý kezeńiniń úshinshi beldesýinde brazılııalyq sportshy Erıke Takabatıkege ese jiberip qoıdy. Solaısha, jarys jolynan shyǵyp qaldy. Ol óziniń birinshi kezdesýinde túrkııalyq Sahın Ahmed Kabadan, ekinshi aınalymda monakolyq ıAn Tsıkkardıden aılasyn asyrǵan bolatyn.
Aıta keteıik, álem birinshiligin tikeleı efırde «Qazsport» telearnasy kórsetip jatyr.
