Ǵalamtordy baqylaý barysynda ekstremıstik mazmundaǵy 10 852 materıal anyqtalǵan

ASTANA. KAZINFORM — 2025 jyldyń alǵashqy alty aıynda Qazaqstanda 40 myńnan astam túsindirý jumystary júrgizilip, olarǵa elimizdiń barlyq óńirlerinen 1,5 mıllıonnan astam adam qatysqan. Bul týraly Mádenıet jáne aqparat mınıstrligi málim etti.

— Basty nazar dinı ekstremızmniń aldyn alýǵa jáne oǵan qarsy is-qımyldy onlaın júrgizýge aýdaryldy. Alty aı ishinde 17 myńnan astam aqparattyq materıal ázirlenip, onyń 2 482-si buqaralyq aqparat quraldarynda jarııalandy, al áleýmettik jelilerde 60 myńnan astam jarııalanym ornalastyryldy. Aqparattyq jumys zaıyrly qundylyqtardy nasıhattaýǵa, konfessııaaralyq kelisimdi nyǵaıtýǵa jáne ekstremıstik ıdeologııaǵa qarsy tura alatyn turaqty ımmýnıtet qalyptastyrýǵa baǵyttalǵan, — delingen habarlamada.

Internet jelisin baqylaý nátıjesinde ekstremıstik mazmundaǵy 10 852 materıal anyqtaldy, olardyń 3 126-sy joıyldy. Dintaný saraptamasy 2 myńnan astam materıaldy zerdeledi. Onyń shamamen 70%-ynyń qorytyndysy oń boldy, al 20%-ynda dinı mazmun belgileri anyqtalǵan joq.

Jumystyń mańyzdy bóligi — dinı qyzmet salasyndaǵy zańnamany jetildirý. 2025 jyldyń qańtarynan bastap «eskertý» ınstıtýty engizildi jáne QR ÁQBtK-niń 490-baby boıynsha aıyppul mólsheri 50% tómendetildi. Sondaı-aq, dinı ádebıetti taratý oryndaryn kelisý tártibi jeńildetildi.

Budan bólek, senim bostandyǵy men dinı nanym-senimdi baǵalaý boıynsha Ulttyq ındıkatorlar bekitildi. Olar konfessııaaralyq qatynastardyń, memleket pen dinı birlestikterdiń ózara baılanysyn, sondaı-aq ınternettegi dinı belsendilik kórsetkishin anyqtaıdy.

Eske sala keteıik, buǵan deıin mınıstr Aıda Balaeva dinı ekstremızm men terrorızmdi nasıhattaıtyn 14 myńnan astam materıal joıylǵanyn habarlaǵan bolatyn.