Ǵalamtordaǵy Elbasynyń qanatty sózderi: Aýyldyń amandyǵy - eldiń amandyǵy

ASTANA. QazAqparat - Aqordanyń Feısbýktegi resmı paraqshasynda QR Prezıdenti Nursultan Nazarbaevtyń qanatty sózderi jarııalandy.

Elbasy san-salaly memlekettik qyzmetten qoly qalt etkende tabıǵat aıasynda bolǵandy unatady. Árıne, moınynda bútin bir eldiń jaýapkershiligi turǵan Prezıdent ómirinde mundaı sátter tym sırek bolady. Týǵan jerdiń sulý kórki shabyttandyrǵan Nursultan Ábishulynyń kesteli oı, kórkem tolǵanystary barshylyq. Solardyń bir shoǵyryn búgin biz «Feısbýk» oqyrmandary nazaryna usynyp otyrmyz.

***
Qazaqtyń keń baıtaq jerinde ańyzǵa aınalmaǵan tus tipti az, bári de qasterli ólke, qasıetti meken.
***
Qasıetti qazaq jeri - ata-babalarymyzdyń dańqty tarıhyn atynyń tuıaǵymen jazyp ketken jer.
***
Jalpaq jurtyńdy, ıisi alashyńdy qurmetteý aldymen óziń turǵan ólkeniń tarıhyn, tabıǵatyn tanýdan, adamdaryn ardaqtaýdan bastalady.
***
«Kóshpeliler» mal jaıyp ótken jeriniń bárin ózderiniki sanaı bergen» deıtin sandyraqty ǵylymı turǵyda áshkereleý shart.
***
Dombyra únine uıymaǵan, jýsandy dalanyń ıisin ańsamaǵan qazaqty qazaq dep aıtýdyń óz qıyn.
***
Jer abattansa, el abattanady.
***
Biraq bári de ózim týyp-ósken qazaǵymnyń jerine, Alataýdyń bir bókterine jambastaı jyǵylǵan úsh qońyr tóbege jetpedi. Balalyǵymnyń, saǵynyshymnyń altyn qazyǵy sonda eken...
***
Aýyldyń amandyǵy - eldiń amandyǵy.
***
Aýyl - qazaqtyń altyn besigi.
***
Saltanaty jarasqan qalasy bar, baıtaǵy ushan-teńiz dalasy bar, arýaq qoldaǵan babasy bar el ekendigimizdi maqtan eteıik!