Ǵalamtorda jarııalanǵan ólim jazasy kórsetilgen beınerolıktegi er adamdar qazaqstandyqtar emes - UQK
ASTANA. QazAqparat - QR Ulttyq qaýipsizdik komıteti ǵalamtor jelisine salynǵan beınerolıktegi jazalanǵan er adamdardyń Qazaqstan azamattary emes ekendigin málim etti.
«Ulttyq qaýipsizdik komıteti qazaqstandyq arnaıy qyzmet agentteri delingen eki er adamdy jazalaý kórinisi beınelengen beınerolıktiń ǵalamtorǵa ornalastyrylý faktisi boıynsha tıisti tekserý sharalaryn ótkizdi. Rolıkte kórsetilgen tulǵalar Qazaqstan Respýblıkasynyń azamattary emes ekendigi naqty anyqtaldy», - delingen habarlamada. UQK baspasóz qyzmeti Qylmystyq kodekstik 274-babyna sáıkes qoǵamdyq tártipti buzý qaýpin týǵyzatyn nemese azamattardyń nemese uıymdardyń zańdy múddeleri men quqyqtaryna zııan keltiretin nemese qoǵam ne memlekettiń zańdy qorǵalatyn múddeleriniń buzylý qaýpin týdyratyn jalǵan aqparat taratqany úshin 1 myń aılyq eseptik kórsetkishke deıingi kólemdegi aıyppul salý nemese bir jylǵa deıingi merzimge túzeý jumystaryna tartý nemese bir jylǵa deıingi merzimge bas bostandyǵyn shekteý, ne osy merzimge deıin bostandyǵynan aıyrý jazasy qoldanylatynyn eske saldy. «Otandyq BAQ-tardan beıresmı sheteldik aqparat kózderinen materıaldardy alyp jarııalaýda jaýapkershilik tanytýlaryn suraımyz», - delingen habarlamada.
