Ǵalamtorda pikir jazatyndar uıaly telefon arqyly tirkelýi múmkin

ASTANA. QazAqparat - Aqparat jáne kommýnıkatsııalar mınıstrligi elektrondy buqaralyq aqparat quraldarynda pikir qaldyratyn azamattardy uıaly telefon nómiri arqyly tirkep otyrýdy usynyp otyr, dep xabarlaıdy QazAqparat tilshisi.

Buqaralyq aqparat quraldary, aqparattandyrý jáne baılanys salasyndaǵy memlekettik baqylaý komıteti tóraǵasynyń orynbasary Mıxaıl Komıssarovtyń aıtýynsha, jańa zańǵa engiziletin atalǵan norma bekitilse, pikir jazatyn barlyq kommentatorlar jeke telefon nómirleri arqyly aýtentıfıkatsııadan ótetin bolady.

«Bul degenimiz, bir adam pikir qaldyrǵysy kelse, aldymen óz telefon nómirin engizedi. Osydan keıin oǵan sms-xabarlama keledi. Ondaǵy kod arqyly ol óz pikirin jarııalaı alady. Ondaı normanyń negizgi maqsaty - arandatýshylyq áreketterdiń aldyn alý. Óıtkeni búginde keıbir máseleler boıynsha týyndaıtyn «kommentatorlyq» daý-damaılar shekten asyp, ultaralyq kelispeýshilikterge ulasyp jatady. Al arandatýshylyq oıy bar adam telefon nómiri arqyly pikir qaldyratyn bolsa, ózi jazǵan sózi úshin jaýapkershiliktiń bolatynyn sezedi», - dep atap kórsetti Komıssarov.

Aqparat jáne kommýnıkatsııalar vıtse-mınıstri Alan Ájibaevtyń sózine qaraǵanda, atalǵan norma áli de talqyǵa salynatyn bolady. Jalpy, aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly zańǵa qatysty 200-ge jýyq usynys bar. Arnaıy jumys toby osy ózgeristerdiń bárin jan-jaqty zerdelep shyqty.