Ǵalamtorda óshpendilik týdyratyndar jazadan qutylmaýy tıis - QR Tuńǵysh Prezıdenti

NUR-SULTAN. QazAqparat - Jelide dinı óshpendilik otyn jaǵatyn qylmyskerler jazadan qutylmaýy tıis. Bul týraly Qazaqstan halqy Assambleıasynyń XXVII sessııasynda QR Tuńǵysh Prezıdenti - Elbasy, QHA Tóraǵasy Nursultan Nazarbaev málim etti, dep habarlaıdy QazAqparat tilshisi.

«Elemeı júrýge bolmaıtyn qazirgi zamanǵy jahandyq syn-tegeýrinniń taǵy bir túri - ol tsıfrlyq kommýnıkatsııalardyń damýy. Olar sózsiz ıgiliginen bólek, destrýktıvtik áleýetti de ilestirip júretini anyq. Tsıfrlyq kommýnıkatsııalardyń múmkindikteri etnıkalyq jáne dinı óshpendilik otyn jaǵýǵa, sondaı-aq lańkestik aktilerdi jasaýǵa jıi qoldanylady», - dep toqtaldy N. Nazarbaev.

Tuńǵysh Prezıdent búginde tutas jelilik qoǵamdastyqtar eshqandaı shekarany bilmeıtin qastyqtyń, ksenofobııanyń oshaǵyna aınalyp jatqanyn atap ótti.

«Jelide ózderiniń óńi men aty-jónin jasyra otyryp, keıbir adamdar qylmystary úshin jazasyz qutylamyz dep oılaıdy. Alaıda olar jaýapkershilikten qutylmaıdy. Memleketter osyndaı zańsyzdyqtarǵa qarsy batyl sheshimderdi qabyldaýy kerek», - dedi N. Nazarbaev.