Ǵalamtor júıesi aýyldarǵa ornatylmaq
ASTANA. QazAqparat - Ǵalamtordy, basqa da aqparattyq tehnologııalardy paıdalaný, kompıýterdi keńinen meńgerý búgingi ómirdiń talaby.
Damyǵan, órkenıetti qoǵam qurý úshin tehnıkanyń tilin jetik biletin básekege qabiletti urpaq tárbıeleýdiń mańyzy zor. Búginde keshegi hat-habardyń orynyn almastyryp, damýdyń dara joldaryn kórsetip otyrǵan, aıshylyq alys jerlerden jyldam habar alǵyzatyn ǵalamtordyń áleýeti artqan. Onda kerek degen aqparyńyzdy kedergisiz tabýǵa kóp múmkindik qarastyrylǵan. Qaı qıyrda júrseńiz de ǵalamtordy paıdalana alasyz dep aıtýdan aýlaqpyz, árıne, ásirese, shalǵaı aýyldarda ony paıdalanýdyń múmkindikteri ókinishke oraı az bolyp otyr. Birazdan beri minberlerde kóterilip kele jatsa da sheshimin tappaı qoıǵan kúrmeýli máseleniń túıini tarqatylatyn kún alys emes sııaqty. Qazir «Aqparattandyrý týraly» zań jobasy daıyndalyp depýtattar talqysyna usynyldy. Investıtsııalar jáne damý vıtse-mınıstri Asqar Jumaǵalıevtyń aıtýynsha, shalǵaıdaǵy aýyl-aımaqtarda ǵalamtor jelisi tartylǵan bolsa da kóbisi eski tehnologııamen jumys jasaıdy, sol sebepti onyń qarqyny báseń, jumys isteý qabileti tómen. Osyǵan sáıkes, aldaǵy 3 jyldyń ishinde talshyqty-optıkalyq ınternet barlyq aýyldy qamtymaq. Kelesi jylǵa deıin mejede turǵan aýyldarǵa osy ǵalamtor jelisin jetkizý josparda bar. Zamanǵa saı urpaqty tárbıeleý jolynda memlekettik standartqa saı bilim berýdiń mańyzy zor desek, birte-birte oqytý júıesi de osy ǵalamtorǵa táýeldi bolyp kele jatqandyǵyn baıqaý qıyn emes. Bul turǵyda aýyl balalarynyń da qala oqýshylarynan kem bilim almaýy mańyzdy.
