Ǵalamtor betterinde Qurannyń burmalanǵan nusqasy júr
ASTANA. 27 qyrkúıek. QazAqparat - Musylmandar álemine asa belgili «ál-Azhar» ıslam ortalyǵy ǵalamtor betinde qasıetti Quran aıattarynyń burmalanǵan nusqalarynyń júrgenin habarlaıdy. Bul týraly muslim.kz habarlady.
Osyǵan oraı, ıslam zertteý ortalyǵynyń tóraǵasy sheıh Tofık Abdel-Azız Quran aıattaryn ǵalamtordan oqıtyndarǵa óte muqııat bolýdy eskertedi. Jalǵan aıattarǵa jolyqpas úshin sheıh Tofık memlekettik tirkeýdegi «ál-Azhar» veb-portalynyń, din mınıstrliginiń nemese ««Dar ýl-Ifta» sııaqty sharıǵat ordalarynyń saıttaryna silteme kórsete kelip, osy saıttardan Quran aıattarynyń senimdi nusqasyn tabýǵa bolatynyn jetkizdi. Ol sondaı-aq, dinı saıttardyń tizginin ustaǵan redaktorlardy osy máselege qatysty abaı bolýlaryn eskertti.
Qasıetti Qurannyń burmalanǵan mátinin aldymen áleýmettik jelini paıdalanatyndar baıqaǵan eken. Naqtyraq aıtqanda, «ál-Imran» súresiniń 7-shi aıatynda «ál-Haq» (Aqıqat) sózi kezdesken. Qasıetti Quranda bul sóz joq.
