Ǵalamshardy qutqarý úshin buryn-sońdy bolmaǵan ınvestıtsııa qajet – Qazaqstan Prezıdenti
«COVID-19 pandemııasy bıologııalyq qaýip-qaterlerdi basqarý men azaıtý úshin shuǵyl shara qabyldaý qajettigin aıqyndap berdi. Halyqaralyq yntymaqtastyq úshin arnaıy ınstıtýt nemese organ qurýǵa eshqandaı shara qabyldamaı, 50 jyldan beri Bıologııalyq qarý týraly konventsııanyń erejelerin áli de ustanýymyz bizdi alańdatýy kerek. Osyǵan oraı buǵan deıin usynǵan Bıologııalyq qaýipsizdik jóninde halyqaralyq agenttik qurý týraly bastamamdy qaıta eske salǵym keledi», - dedi Qasym-Jomart Toqaev BUU Bas Assambleıasy 77-sessııasynyń jalpy debatynda.
Óz sózinde Prezıdent halyqaralyq qaýipsizdikke tóngen qaýippen qatar klımattyń ózgerý problemasy da aýqymdy halyqaralyq yntymaqtastyq pen nıettestikti qajet etetinin aıtty. «Búkil álem halqy aýa raıy men qorshaǵan ortanyń ózgerýine baılanysty týyndaǵan qatermen betpe-bet kelip otyr. Eger jaǵdaıdy jaqsartqymyz kelse, jyldam iske kóshýimiz qajet. Kópshiligimiz qazirdiń ózinde bul baǵytta batyl qadamdar jasadyq. Qazaqstan 2060 jylǵa qaraı elimizdiń energetıka sektorynyń munaı men gazǵa táýeldiliginen kómirteginen beıtarap ekonomıkaǵa tolyq kóshirý mindetin aldy», - dedi Qazaqstan Prezıdenti.
Sonymen birge Q. Toqaev ǵalamshardy qutqarý úshin buryn-sońdy bolmaǵan kólemde ınvestıtsııa qajet ekenin aıtty.
«Biraq klımattyń ózgerýine qarsy kúres damý nemese jańǵyrý protsesi esebinen júrgizilmeýi kerek. Sondyqtan osy jyly ótetin COP27 klımattyq konferentsııasynda Uıymǵa múshe memleketter, sondaı-aq jahandyq bıznes-qoǵamdastyq klımatqa qatysty qarjylandyrý jónindegi óz mindettemelerin taǵy da ulǵaıta túsýi kerek», - dedi Memleket basshysy.
Budan buryn habarlanǵandaı, Qazaqstan Prezıdenti Birikken Ulttar Uıymy Bas Assambleıasy 77-sessııasynyń Jalpy debatynyń ashylýyna qatysyp otyr.
Oǵan deıin Memleket basshysy BUU Bas Assambleıasy 77-shi sessııasynyń aıasynda Eýropalyq komıssııa prezıdenti Ýrsýla fon der Lıaıenmen ekijaqty kelissóz júrgizdi.
Qasym-Jomart Toqaev Birikken Ulttar Uıymy Bas Assambleıasy 77-sessııasy plenarlyq otyrysynyń aldynda Iordanııa Koroli ІІ Abdallamen áńgimelesti.
Foto:akorda.kz
