«Ǵalamshardy qozǵaıyq» aktsııasy kezinde adamdar qorshaǵan ortaǵa qaýipsiz kólik quraldaryn paıdalanady
MATY. 20 qyrkúıek. QazAqparat /Erlik Erjanuly/ - «Ǵalamshardy qozǵaıyq» aktsııasy kezinde 180-nen astam eldiń turǵyndary qorshaǵan ortany qaldyqtardan ǵana tazalap qoımaı, sporttyq-saýyqtyrý sharalaryn ótkizip, qaýipsiz kólik quraldaryn paıdalanatyn bolady.
Bul jaıynda «Tazalyqty mura eteıik» jelisiniń jetekshisi Dáýren Qaısarov búgin Almatyda ótken baspasóz máslıhatynda aıtty.
«Alǵashqy jyldary bul aktsııaǵa 30-50 el ǵana qatysqan bolatyn. Qazir 180-ge jetip, bul sharaǵa qatysatyn adamdardyń sany 300 mıllıonǵa jýyqtamaq. Oǵan Qazaqstannan bıyl 24 qaladan 35-40 myń adamǵa deıin qatysýy múmkin. Aktsııa kezinde olar velosıpedpen júrip, skeıdbord pen rolık teýip, baıdarkamen júzedi", - deıdi D. Qaısarov. Bul sharany olar eriktiler baǵdarlamasy boıynsha jumys isteıtin úkimettik emes uıymdarmen birlesip júzege asyrmaq. Oǵan jarty jyl boıy daıyndyq jasaǵan.
"Qazir ár óńirden jurtshylyqty uıymdastyryp, ortaq iske jumyldyratyn eriktilerdi taptyq dep aıta alamyz. Olar óz isimen ózgelerge úlgi kórsetý arqyly oı salyp, qorshaǵan ortany taza ustaýǵa jáne qorǵaýǵa jurtshylyqtyń jappaı atsalysýyna túrtki bolmaq. Máselen, almatylyqtar bul kúni Almaarasan, Medeý shatqaldary men Botanıkalyq baq jáne Baým atyndaǵy toǵaıdy tazalaıtyn bolady. Jalpy dástúrli bul aktsııa kelesi jyly "Ǵalamshardy tazalaıyq" degen uranmen ótpek", - dedi Dáýren Qaısarov.
