Ǵalamshardaǵy eń qart er adam 112 jasynda ómirden ozdy
ASTANA. 16 qyrkúıek. QazAqparat - Ómir súrý uzaqyǵy boıynsha rekordtar kitabyna engen ıspandyq Salýstıano Sanches AQSh-ta 113-ke qaraǵan shaǵynda ómirden ozdy.
Associated Press-tiń habarlaýynsha, ol 1901 jyly Ispanııanyń soltústik-batysyndaǵy aýylda dúnıege kelgen. 17 jasynda Kýbaǵa baryp, sál keıinirek AQSh-qa qonys aýdarǵan. Sanches uzaq ýaqyt boıy kómir shahtasynda jumys istegen. Onyń eki úly bar. Al olardan jeti nemere, 15 shóbere, bes shópshek kórgen.
Aıta keteıik, jer sharynda uzaq ómir súrgen adam retinde resmı frantsýzdyq Janna Lýıza Kalman tirkelgen bolatyn. Ol 1997 jyly 122 jasynda qaıtys boldy.
