Ǵalamshar Shveıtsarııanyń kólemindeı tropıkalyq ormanynan aıyryldy
ASTANA. QazAqparat – 2022 jyly ǵalamshar Shveıtsarııa nemese Nıderlandy kólemindeı tropıkalyq ormanyn joǵaltty: spýtnıkten alynǵan derekterge sáıkes, asa mańyzdy ekojúıeniń basym bóligi aýyl sharýashylyǵy jáne mal sharýashylyǵy úshin joıylǵan. Bul týraly QazAqparat euronews-ke silteme jasap habarlaıdy.
Ótken jyly ár 5 sekýndta kólemi fýtbol alańyndaı tropıkalyq aǵashtar órtendi nemese kesildi. Bul 2021 jylmen salystyrǵanda 10% kóp, dep málimdedi Vashıngton álemdik resýrstar ınstıtýty (WRI).
Eń kóp zardap shekken el – Brazılııa, onyń joıylǵan aýmaǵy jahandyq shyǵyndardyń 43% quraıdy, odan keıin Kongo Demokratııalyq Respýblıkasy (13%) jáne Bolıvııa (9%) tur.
Brazılııada ormandardy qurtý jaǵdaıy odan ári nasharlap, bir jylda taǵy 15% artty, delingen GFW jyl saıynǵy baıandamasynda. Brazılııanyń eks-prezıdenti Jaır Bolsonarý bılik basynda bolǵan kezde ormannyń zańsyz kesilýine kóz juma qaralyp kelgen. Qańtar aıynda onyń ornyna kelgen prezıdent Lýıs Inasıo Lýla da Sılva Brazılııa Amazonkasynyń joıylýyn 2030 jylǵa qaraı toqtatýǵa ýáde berdi.
Alaıda, sarapshylar bul maqsatqa jetý jolynda kóptegen kedergi bar dep sanaıdy. WRI málimetteri boıynsha, 2022 jyly joıylǵan tropıkalyq ormandar 2,7 mıllıard tonna ottegi shyǵardy, bul álemdegi eń kóp qonystanǵan Úndistannyń jyldyq shyǵaryndysymen teń. Shamamen 1,6 mıllıard adam kúnkóris kózi retinde orman resýrstaryna tikeleı táýeldi.
