Ǵalamdyq ekologııalyq qor Qazaqstandaǵy jobaǵa 5 mln. dollar bólip otyr
Búgin Astanada «Týǵan jer» agrarlyq-ekologııalyq odaǵy» qoǵamdyq birlestiginiń uıymdastyrýymen ótken baspasóz máslıhaty barysynda orman sharýashylyǵynyń mamany Talǵat Kerteshev osylaı málim etti.
Mamannyń aıtýynsha, Bıologııalyq alýan túrlilik týraly konventsııaǵa sáıkes, soǵan qosylǵan 191 eldiń barshasy óz elindegi erekshe qorǵalatyn tabıǵı aýmaqtardy saqtap qalý úshin ulttyq parkter qurady.
«Osy Konventsııa sheginde Qazaqstan Úkimeti erekshe qorǵalatyn aýmaqtar qurýdy jyldan jylǵa arttyryp keledi. Onyń nátıjesi de belgili», - deıdi T. Kerteshev.
Onyń aıtýynsha, byltyr Jońǵar Alataýy sheńberinde halyqaralyq ulttyq park qurylǵan bolatyn. Búgingi kúni osy aımaqtarda týrızmdi damytýǵa basa nazar aýdarylyp keledi.
«Kelesi jyly elimizdiń shóldi aımaqtarynda halyqaralyq joba júzege asyryla bastaıdy. Bul joba negizinen ekologııalyq júıelerdi saqtaýǵa arnalady. Osy rette Іle-Balqash óńiri birinshi klassterlik ýchaske retinde aıqyndalsa, ekinshisi Qyzylorda oblysyndaǵy Aral mańyndaǵy, ústirttegi sekseýilder jobalyq aýmaq bolyp belgilendi. Bul baǵytqa Ǵalamdyq ekologııalyq qor 5 mln. dollar shamasynda qarajat bólip otyr», - dedi T. Kerteshev.
Onyń sózine qaraǵanda, joba 5 jyldyq merzimdi qamtymaq.
