Ǵalamdy ıadrolyq qarýdan azat etýdi qalaımyz - QR Prezıdenti

ASTANA. QazAqparat - Jappaı qyryp-joıatyn qarýdy taratpaý rejimin nyǵaıtý arqyly ǵalamdy ıadrolyq qarýdan azat etýdi qalaımyz. Búgin Aqordada birqatar shetel Elshisinen senim gramotasyn qabyldaǵan Qazaqstan Prezıdenti Nursultan Nazarbaev osylaı aıtty, dep habarlaıdy QazAqparat.

«Qazaqstan bıylǵy qańtar aıynda BUU Qaýipsizdik keńesiniń tóraǵasy rólindegi tarıhı qyzmetine kiristi. Osy mańyzdy organnyń kún tártibindegi barlyq máselelerge saı jumys júrgizip jatqanymyzdy bilesizder. Bıyl jyldyń 18 qańtarynda BUU Qaýipsizdik keńesiniń «Jappaı qyryp-joıatyn qarýdy taratpaý: senim sharalary» atty brıfıngine qatysýdy josparlap otyrmyn»,- dedi Elbasy.

Memleket basshysy bul taqyryp kezdeısoq tańdalmaǵandyǵyn da basa aıtty.

«Biz taratpaý rejimin dáıekti túrde nyǵaıtý men keńeıtý arqyly ǵalamdy ıadrolyq qarýdan azat etýdi qalaıtyndyǵymyzdy aıtyp kelemiz», - dedi Nursultan Nazarbaev.

Elbasy ekonomıkalyq baǵyt Qazaqstannyń sheteldik áriptesterimen yntymaqtastyǵynyń basty arqaýy ekendigin de atap ótti.

«Bul úshin iskerlik ahýaldy jaqsartý jumystary jalǵasýda. Búginde Qazaqstan bıznes júrgizý jeńildigi kórsetkishi boıynsha 190 eldiń ishinde 36 orynda tur. Eńbek naryǵynyń tıimdiligi kórsetkishi boıynsha biz 35 oryndamyz. 2017 jyly vızasyz rejim qoldalynatyn elder sanyn 62-ge jetkizdik. Investorlarǵa jeńildikter qarastyrylǵan «bir tereze» qaǵdıdasy boıynsha jumys istep kelemiz. Kásipkerlik salasynda zańnama jetildirilip, jańa Salyq kodeksi qabyldandy. 10 arnaıy ekonomıkalyq aımaq pen 20-ǵa jýyq ındýstrııalyq aımaq jumys istedi»,- dep atap ótti QR Prezıdenti.