Gaıtıdegi avtotsısterna jarylysynan qaza tapqandar sany 60-qa jetti
GAVANA. QazAqparat - Gaıtıdiń soltústigindegi Kap-Gaıtıen qalasynda janarmaı tasıtyn avtotsısternanyń jarylysynan qaza tapqandar sany 60-qa jetti, dep habarlaıdy QazAqparat Le Nouvelliste basylymyna silteme jasap.
Buǵan deıin 50-ge jýyq adamnyń mert bolǵany habarlanǵan edi. Jarylys ornyna jaqyn ornalasqan 20-dan astam ǵımarat zardap shekti.
Gaıtı bıligi úsh kúndik ulttyq aza tutý jarııalady.
«Úkimetimniń jáne Gaıtıdiń búkil halqynyń, sonyń ishinde dıasporanyń atynan qaza bolǵandardyń týystaryna, sondaı-aq osy qaıǵyly oqıǵadan tikeleı nemese janama zardap shekkenderdiń barlyǵyna shyn júrekten kóńil aıtamyn. Búkil el aýmaǵynda úsh kúndik ulttyq aza tutý jarııalandy», - dep jazdy Gaıtı premer-mınıstri Arıel Anrı Twitter-de.
Aldyn ala málimet boıynsha, avtotsısterna jergilikti ýaqyt boıynsha tún ortasy shamasynda jolda aýdarylyp ketken. Sol mańdaǵy adamdar osy múmkindikti ózderiniń baktaryna janarmaı quıýǵa paıdalanyp jatqan sátte birneshe adam ólimine ákelgen jarylys boldy. Kúıik shalǵandardyń 50-ge jýyǵy aýrýhanada jatyr.
