Gaıtıdegi qyrǵynda júzden asa adam qaza tapty

ASTANA. KAZINFORM – Qandy qyrǵyn Gaıtıdegi Sıte-Soleı eldi-mekeninde bolǵan. Wharf Jeremie bandysynyń jetekshisi Monel "Mıkano" Felıks «balamdy dýalady» dep aıyptap, jergilikti qart turǵyndardy qyryp salǵan, dep jazady DW.

Jeksenbi, 8 jeltoqsanda Adam quqyqtaryn qorǵaý boıynsha ulttyq jelisi (RNDDH) habarlaǵandaı, Sıte-Soleı eldi mekeninde Wharf Jeremie bandasynyń qolynan 110 adam qaza tapqan.

Felıks balasy aýyrǵan kezde výdý dinı qyzmetkerinen keńes suraǵan. Ol jergilikti turǵyndardy «balany dýalady» dep aıyptaǵan. Artynsha Felıks Sıte-Soleıde turatyn qarttardy qyryp salýǵa buıryq bergen. 

Soıyl, sondaı-aq pyshaqpen qarýlanǵan top músheleri jumada 60 adamdy, senbide 50 adamdy óltirgen. RNDDH málimetteri boıynsha barlyq qurbandardyń jasy 60-tan asqan. Felıkstiń balasy senbi kúni tústen keıin qaıtys boldy.

Aıta keteıik, 2022 jyly Monel «Mıkano» Felıkske kórshi Domınıkan Respýblıkasyna kirýge tyıym salynǵan. Birikken Ulttar Uıymynyń (BUU) málimetine sáıkes, 2024 jyl qazan aıynda Wharf Jeremie bandysynyń sany 300 adamdy quraǵan.

El astanasy Port-o-Prens portyna jaqyn ornalasqan Sıte-Soleı eldi mekeni – Gaıtıdegi eń kedeı jáne eń qaýipti aımaqtardyń biri. Saıası alaýyzdyqqa ushyraǵan el bıligi astana men onyń aınalasyndaǵy qarýly toptarmen kúres júrgizip jatyr.  

2022 jyly el úkimeti jergilikti polıtsııaǵa kómektesý úshin halyqaralyq kómek suraǵan, alaıda 2023 jyly BUU Qaýipsizdik Keńesi bekitken mıssııa saıasatyna saı, jartylaı ǵana kómek usynylǵan. Aıtarlyqtaı resýrstarmen qamtamasyz etilmeı otyr. 

Aıta keteıik, Gaıtıdegi qylmyskerlerdiń jartysy – balalar. Bul týraly UNICEF baıandamasynda aıtylǵan.