Gaıtıde janarmaı tasymaldaıtyn kólik jarylyp, 60 adam qaıtys boldy
GAVANA. QazAqparat – Gaıtıdiń soltústigindegi Kap-Aıten qalasynda janarmaı toltyrylǵan avtotsısterna jarylyp, mert bolǵandar sany 60 adamǵa jetti, dep habarlaıdy QazAqparat reseılik TASS agenttigine silteme jasap.
Jarylys saldarynan taǵy 50 adam jaraqat aldy.
Seısenbi kúni Le Nouvelliste basylymy jergilikti bılik ókilderine silteme jasap, jarylys bolǵan aımaqta 20 ǵımaratqa zaqym kelgenin habarlady.
Gaıtı bıligi úsh kúndik Aza tutý kúnin jarııalady.
«Úkimet pen Gaıtı turǵyndarynyń atynan qaıǵyly oqıǵa saldarynan qaza bolǵandardyń jaqyndary men odan zardap shekkenderdiń týystaryna kóńil aıtamyn. El aýmaǵynda úsh kúndiń Aza tutý kúni jarııalanady»,-dep jazdy Gaıtıdiń Premer-Mınıstri Arıel Anrı óziniń Twitter-degi paraqshasynda.
Aldyn ala málimetter boıynsha, avtotsısterna jergilikti ýaqyt boıynsha tún jarymynda jol boıynda aýdarylyp qalǵan. Oqıǵa bolǵan jerden ótip bara jatqandar osy jaǵdaıdy paıdalanyp, kólikteriniń baktaryn benzınge toltyryp alǵan. Bir sátte jarylys bolyp, onyń saldarynan kóptegen adamdar mert bolǵan jáne materıaldyq shyǵyn da keltirilgen. Jarylys saldarynan kúıip qalǵan 50-ge jýyq adam aýrýhanada jatyr.
