Gaıtıde taǵy da jer silkindi
ASTANA. Qańtardyń 21-i. QazAqparat - Gaıtıde taǵy da jer silkindi - bul joly jerasty dúmpýiniń kúshi 6,1 baldy qurady,
dep habarlaıdy RBK agenttigi.
AQSh geologııalyq qyzmetiniń aqparaty boıynsha, zilzala kindigi el astanasy - Port-o-Prens qalasynyń ońtústik-batysyna qaraı 60 shaqyrym jerde, 10 shaqyrym tereńdikte bolǵan. Tsýnamı qaýpi týraly ázirge habar túsken joq.
Karıb araldarynyń jaǵalaýynda ótken aptada bolǵan 7 baldyq jer silkinisi Gaıtı Respýblıkasynyń elordasy - Port-o-Prens qalasyn jermen-jeksen etkenin QazAqparat budan buryn habarlaǵan bolatyn.
Gaıtı premer-mınıstri Jan-Maks Belrıv, búgingi tańda el ókimetiniń qańtardyń 13-inde bolǵan zilzala kezinde 72 myń adamnyń qaza bolǵanyn tirkegendigin málim etken edi.
Bul derekterge úıindilerdi arshyǵannan keıin de týǵan-týystary áli taba almaı otyrǵandar, sondaı-aq eldegi BUU mıssııasynyń qyzmetkerleri kirmegen. Keıbir sarapshylardyń pikirinshe, zilzala qurbandarynyń sany 100-150 myń adamǵa jetýi yqtımal, dep habarlaıdy CNN.
El ortalyǵy - Port-o-Prens qalasy jerasty dúmpýleriniń aýyr saldaryn bastan keshirýde. Úılerdiń kóbisi qıraǵan, aýrýhanalarda jaryq joq.
Qazirgi ýaqytta Port-o-Prenste jaǵdaı múshkil. Polıtseıler tártipti qamtamasyz ete almaı otyr. Qalada qaptap júrgen myńdaǵan tonaýshylar qıraǵan úıler men dúkenderden qoldaryna túsken zattardy alyp ketýde.
