Gaıtıde sý tasqynynan 42 adam qaza tapty
PORT-O-PRENS. QazAqparat – Ótken demalys kúnderi Gaıtıde nóser jaýyn saldarynan myńdaǵan úı sý astynda qaldy, 42 adam qaza taýyp, taǵy 85-i jaraqat aldy, dep habarlaıdy QazAqparat CNN-ge silteme jasap.
Birikken Ulttar Uıymynyń aqparatynsha, qatty jańbyrdan soń Gaıtıde birneshe ózen arnasynan shyǵyp, bul óz kezeginde sý tasqynyna, tas jáne laı kóshkinine ákelip soqqan.
Sý tasqyny saldarynan 13 300-den astam adam úıin tastap ketýge májbúr boldy.
Gaıtıdegi 10 departamenttiń beseýinde: Batys, Nıppes, Ońtústik-Shyǵys, Soltústik-batys jáne Ortalyqta taǵy 11 adam iz-túzsiz joǵaldy.
«Úkimet ulttyq jáne halyqaralyq ınstıtýttarmen birlesip, jaǵdaıdy sheshý úshin shuǵyl sharalar qabyldap jatyr», - dep jazdy Gaıtı premer-mınıstri Arıel Anrı Twitter paraqshasynda.
Dúısenbide jaýǵan jaýyn-shashynnyń saldarynan qaza tapqandar sany taǵy ósti.
Sý tasqynynan zardap shekkenderge kómek kórsetýge shuǵyl áreket etý toptary men kómek kórsetý uıymdary jumyldyryldy.
Gaıtı gýmanıtarlyq kómekke muqtaj.
Sý tasqyny qaýpi 1 maýsymda bastalǵan daýyl maýsymynda jalǵasady dep boljanyp otyr.
