Gaıtıde prezıdent saılaýy 2027 jyldyń shildesine shegerildi
ASTANA. KAZINFORM — Gaıtıdiń ýaqytsha saılaý keńesi eldegi prezıdent saılaýynyń birinshi kezeńin 2027 jylǵy 18 shildege aýystyrdy. Saılaý bıyl 13 jeltoqsanda ótýi tıis bolǵan. Bul týraly el astanasy Port-o-Prensten taraǵan aqparatta aıtylǵan, dep jazady Sınhýa.
Jańartylǵan saılaý kestesine sáıkes, parlament saılaýy da osy kúni ótedi. Al prezıdent saılaýynyń ekinshi kezeńi men jergilikti saılaý 2027 jylǵy 4 qazanǵa belgilengen.
Keńes saılaý kestesin qaıta qaraý jospary bar ekenin 5 qazandaǵy habarlamasynda málimdegen bolatyn. Sol kezde saılaý naýqanynyń birinshi kezeńiniń bastalýy keıinge shegerilgen edi. Naýqan dál sol kúni bastalýy kerek bolǵan.
2021 jyldyń shildesinde Jovenel Moız qastandyqpen óltirilgennen beri Gaıtıde prezıdent saılanǵan joq. Eldegi uzaqqa sozylǵan saıası daǵdarys pen qarýly toptardyń zorlyq-zombylyǵy saldarynan saılaý ótkizý áreketteri birneshe ret sátsiz aıaqtalǵan.
2024 jylǵy sáýirde qurylǵan ýaqytsha prezıdenttik keńes bıylǵy 7 aqpanda ókilettik merzimi aıaqtalǵanǵa deıin prezıdenttik mindetterdi atqardy. Odan keıin bul ókilettik premer-mınıstr Alıks Dıde Fıls-Eme basqaratyn mınıstrler keńesine berildi.
Aıta keteıik, Gaıtıde 1,3 mln adam qarýly bandalardan qashyp, úılerin tastap ketti.
