Gaıtıde qarýly top shabýylynan 12 adam qaza tapty

ASTANA. KAZINFORM – Qaza tapqandar arasynda eki áskerı qyzmetker men on beıbit turǵyn bar, dep jazady Anadoly.

Gaıtıde el astanasy Port-o-Prenske jaqyn jerde ornalasqan Delmas-30 aımaǵynda uıymdasqan qarýly top shabýylynda 2 ásker men 10 beıbit turǵyn qaza tapty.

Jergilikti aqparat quraldarynyń habarlaýynsha, qylmystyq top músheleri turǵyn úılerge shabýyl jasaǵan. Áleýmettik jelide jarııalanǵan vıdeolarda úıler órtenip, kóptegen adamdardyń úılerin tastap ketýge májbúr bolǵany kórsetilgen.

Shabýyl jasaǵan banda basynda burynǵy polıtsııa qyzmetkeri, «Barbekıý» laqap atymen tanymal Jımı Sherıze tur, delingen habarda.

Ulttyq polıtsııa, SWAT bólimsheleri jáne Bandaǵa qarsy ýaqytsha bólimsheler (UTAG) júrgizgen operatsııa barysynda 5 banda múshesiniń kózi joıylǵan.

Gaıtı premer-mınıstri Alıks Dıde Fıls-Aıme qaýipsizdik pen ekonomıkany jaqsartpaı elde saılaý ótkizý múmkin emes ekenin atap ótti. Ol úkimettiń qaýipsizdikti qamtamasyz etýdi mindetteıtinin basa aıtty.

— Biz bandalarǵa qarsy soǵysyp jatyrmyz, bul úlken resýrstardy qajet etetin soǵys, — dep qosty ol.

Birikken Ulttar Uıymynyń Adam quqyqtary jónindegi Joǵarǵy Komıssary basqarmasynyń málimeti boıynsha, 2024 jyly Gaıtıde bandylyq áreketter saldarynan 5,601 adam kóz jumǵan.
Gaıtıdegi qaýipsizdik máselelerin sheshý úshin Kenııadan 900 polıtsııa qyzmetkeri Afrıka basqaratyn kópultty qaýipsizdikti qoldaý mıssııasyna qatysý úshin elge kelgen.

Aıta keteıik, BUU bir aptada Gaıtıdiń 200-den astam turǵyny kóz jumǵanyn málimdegen bolatyn.

Sondaı-aq, jeltoqsan aıynda Gaıtıdegi qyrǵynda júzden asa adam qaza tapqan bolatyn. Qandy qyrǵyn Gaıtıdegi Sıte-Soleı eldi-mekeninde bolǵan. Wharf Jeremie bandysynyń jetekshisi Monel «Mıkano» Felıks «balamdy dýalady» dep aıyptap, jergilikti qart turǵyndardy qyryp salǵan.

Gaıtıdegi qylmyskerlerdiń jartysy — balalar.