Gaıtıde balalar úıindegi órt 15 balanyń ómirin qıyp ketti
PORT-O-PRENS. QazAqparat – Gaıtı astanasynyń ońtústik bóliginde ornalasqan balalar úıinde órt bolyp, 15 bala qaza tapty, dep habarlaıdy QazAqparat agenttigi BBC News-qa silteme jasap.
Qyzyl jalyn eki balanyń ómirin qısa, tútinge ýlanǵan 13-i aýrýhanada kóz jumdy. Jergilikti bılik ókilderi órttiń týyndaý sebepterin anyqtap jatyr. Al balalar úıiniń qyzmetkerleri men tárbıelenýshilerine silteme jasalǵan habarlamalarda úıde elektr jaryǵy bolmaǵandyqtan, maısham paıdalanylǵany aıtylǵan. VVS málimeti boıynsha, órt bolǵan túni balalar úıiniń elektr generatory buzylyp qalǵan.
Amerıkalyq hrıstıandyq top basqaratyn balalar úıi Gaıtıdaǵy resmı ruqsatnamasyz jumys isteıtin júzdegen mekemelerdiń biri.
Bılik ókilderi aman qalǵan balalardy qaýipsiz jerge ornalastyrýmen aınalysyp jatyr. Áleýmettik qamsyzdandyrý ınstıtýtynyń dırektory Arıel Jantı Vılledrýen lıtsenzııasy joq balalar úıinde 60- jýyq jetkinshek turǵanyn rastady. Keıbir derekter boıynsha, balalar úıiniń 2013 jyldan beri lıtsenzııasy bolmaǵan.
«Biz olardy (aman qalǵandardy) tranzıttik ortalyqqa ornalastyrmaqshymyz, ázirge otbasylaryn izdestirip jatyrmyz, olardy ata-analarymen qaýyshtyrǵymyz keledi», - dep málimdedi ol Reuters agenttigine.
